19 ވަނަ ރައްޔިތުންގެ މަޖިލިސް ވެގެންދާނީ ރައްޔިތުންނާ ގާތުން މަސައްކަތް ކުރާ މަޖިލީހަކަށް ކަމަށް ނައިބު ރައީސް ފައިސަލް ނަސީމު ވިދާޅުވެއްޖެއެވެ.
ނައިބު ރައީސް ކުރެއްވި ޓްވީޓެއްގައި ވަނީ އާ ރައްޔިތުން މަޖިލީހުގެ ރައީސް ކަމަށް ކުރީގެ ރައީސް އަދި މައްޗަންގޯޅި މެދު ދާއިރާގެ މެމްބަރު މުހައްމަދު ނަޝީދު އަދި ނައިބު ރައީސް ކަމަށް ގަލޮޅު އުތުރު ދާއިރާގެ މެމްބަރު އީވާ އަބްދުﷲ އިންތިހާބުވުމުން މަރުހަބާ ވިދާޅުވެފައެވެ.
"އިރާދަކުރެއްވިއްޔާ 19 ވަނަ ރައްޔިތުންގެ މަޖިލިސް ވެގެންދާނީ ރައްޔިތުންނާ ގާތުން މަސައްކަތް ކުރާ މަޖިލީހަކަށް" ނައިބު ރައީސް ވިދާޅުވިއެވެ.
Marhaba Majlis Raees, Raees @MohamedNasheed Naib Raees @evattey adhi emmeha izzaiytheri membarun. Iraadhakureviyya 19vana majlis vegen dhaany rayyithunnaa gaathun masakkaiy kuraa majleehakah.
— Faisal Naseem (@FaisalNasym) May 28, 2019
އާ މަޖިލީހުގެ މެމްބަރުން ރޭ ހުވާ ކުރައްވާފައިވާއިރު މަޖިލީހުގެ ރައީސް ކަމުގެ މަގާމަށް ނަޝީދު އިންތިހާބުވެ ވަޑައިގެންނެވީ މާމިނގިލީ ދާއިރާގެ މެމްބަރު ގާސިމް އިބްރާހިމްއާ ވާދަކޮށް 67 ވޯޓު ހޯއްދަވައިގެންނެވެ. ގާސިމަށް ލިބިވަޑައިގެންނެވީ 17 ވޯޓެވެ.
މަޖިލީހުގެ ނައިބު ރައީސްގެ މަގާމަށް ކުރިމަތިލެއްވީ އީވާ އެކަނި ކަމަށްވާއިރު، އޭނާ އެ މަގާމަށް އިންތިހާބީ 70 މެމްބަރުންގެ ތާއީދާއެކުއެވެ. އީވާ އެ މަގާމަށް ގެނައުމާ ދެކޮޅަށް ނުވަ މެމްބަރަކު ވޯޓު ދެއްވިއެވެ.
މަޖިލީހުގެ 87 ދާއިރާގެ ތެރެއިން 65 މެމްބަރުން ނިސްބަތްވެ ވަޑައިގަންނަވަނީ އެމްޑީޕީ އަށެވެ.