ޖުޑީޝަލް ސަރވިސް ކަމިޝަން (ޖޭއެސްސީ) އަށް ތުޅާދޫ ދާއިރާގެ މެމްބަރު ހިސާން ހުސައިންގެ ނަން ހުށައެޅުމަށް އެމްޑީޕީގެ ޕާލިމެންޓްރީ ގްރޫޕް (ޕީޖީ) އިން މިއަދު ފާސްކޮށްފިއެވެ.
ހިސާންގެ ނަން ފާސްކޮށްފައިވަނީ ހާޒިރުވެވަޑައިގެން ތިއްބެވި މެމްބަރުންގެ އިއްތިފާގުންނެވެ.
ނިމިގެން ދިޔަ 18 ވަނަ މަޖްލިސްގައި މަޖްލިސް މެމްބަރުންގެ ތެރެއިން ޖޭއެސްސީގައި ހުންނެވީ ކުރީގެ ދިއްގަރު ދާއިރާގެ މެމްބަރު އަހުމަދު ފާރިސްއެވެ. ފާރިސް ޖޭއެސްސީއަށް އައްޔަން ކުރީ ކުރިން ޖޭއެސްސީގެ މެމްބަރުކަމުގައި ހުންނެވި އިބްރާހިމް ރިޒާ އިތުބާރު ނެތްކަމަށް ފާސްކޮށްފައެވެ.
ރައީސް ނަޝީދުގެ ވަކީލުންގެ ޓީމުގައި ހިމެނިވަޑައިގެންނެވި ހިސާން ވަނީ އިނގިރޭސިވިލާތުގައި ގާނޫނީ ދާއިރާއިން އިން 2005ގައި މާސްޓާޒް ފުރިހަމަކުރައްވަާފައެވެ.
އެމްޑީޕީގެ ލީގަލް ޓީމުގައި ވެސް ހިމެނި ވަޑައިގެންނެވި ހިސާން އަކީ ރާއްޖޭގެ ޖުޑިޝަރީގެ މައްސަލަ ތަކާއި ގުޅޭގޮތުން އަބަދުވެސް ވަކާލާތު ކުރައްވާ ފަރާތެވެ.
މަޖްލިސްގެ ރައީސް ކަމަށް ކުރީގެ ރައީސް މުހައްމަދު ނަޝީދު އިންތިހާބު ވުމާއި ގުޅިގެން އެމަނިކުފާން ޖޭއެސްސީގެ މެމްބަރުކަމަށް ރައީސް އިބްރާހިމް މުހައްމަދު ސޯލިހު ރޭ ވަނީ އައްޔަން ކުރައްވާފައެެވެ.