ކުރީގެ ނައިބު ރައީސް އަހުމަދު އަދީބުގެ މައްޗަށް ސާބިތުވެފައިވާ ޚިޔާނާތުގެ މައްސަލަ ސުޕްރީމް ކޯޓުން ބާތިލުކޮށް، މިނިވަން ކޮށްފިއެވެ.
މި ހުކުމުން ސަލާމަތްވެ އަދީބު ވަނީ އުފުލިފައިވާ 33 އަހަރުގެ ޖަލު ހުކުމުން އެއްކޮށް ސަލާމަތްވެފައެވެ. އަދީބު މިހާރުވެސް ހުންނެވީ ކޯޓު އަމުރެއްގެ ދަށުން ގޭބަންދަށް ދޫކޮށްލެވިފައެވެ.
ފިސްތޯލާއެއް ގެންގުޅުއްވި ކަމުގެ ކުށާއި ކުރީގެ ރައީސް ޔާމީންގެ ފިނިފެންމާ ލޯންޗުގައި އެއްޗެއް ގޮއްވާލި ކުށް ސާބިތުވެ 3 ހުކުމް ކައިރި ކައިރީގައި އިއްވާފައިވާ އަދީބު މިނިވަން ވެފައިވަނީ ސުޕްރީމް ކޯޓުގައި ތިން މައްސަލަވެސް އިސްތިއުނާފް ކުރުމުންނެވެ.
ފިސްތޯލަ ގެންގުޅުނު މައްސަލަ ސުޕްރީމް ކޯޓުން ބެލުމަށް ފަހު ބާތިލް ކޮށްފައިވާއިރު، ލޯންޗުކޮޅުގައި އެއްޗެއް ގޮއްވި މައްސަލާގައި ސުވާލު އުފެދޭ ކަންތައް ހުރުމުން މައްސަލަ އަލުން ބަލަން އަމުރުކޮށް އެ ހުކުމް ވެސް (15 އަހަރު ދުވަހުގެޖަލު ހުކުމް) ވަނީ ބާތިލުކޮށްފައެވެ. ފިސްތޯލަ ގެންގުޅުނު މައްސަލަ ސާބިތުވެ އިއްވާފައިވަނީ 10 އަހަރު ދުވަހުގެ ޖަލު ހުކުމެކެވެ.
މަގާމުގެ ނުފޫޒު ބޭނުންކޮށްގެން ދައުލަތަށް ޚިޔާނާތްތެރިވެ އުފުލުނު ދައުވާ ސާބިތުވެ ކްރިމިނަލް ކޯޓުން އިއްވާފައިވަނީ އަށް އަހަރު ދުވަހުގެ ޖަލު ހުކުމެކެވެ. ޖުމުލަ 33 އަހަރު 2015 ވަނަ އަހަރު ކުރި ޝަރީއަތްތަކުގައި އަދީބަށް ޖަހާފައިވާއިރު އޭރު އަދީބު ވިދާޅުވީ އެއީ ޖޯކެއް ކަމަށާއި ޝަރީއަތަށް ނުދަނީސް ހުކުމް ލިޔެވިފައި އޮންނަ ކަމަށެވެ.
ރައީސް ޔާމީންގެ ވެރިކަމުގައި ސިޔާސީ ގޮތުން އެމަނިކުފާނާ ވާދަވެރިކަން ފެނިގެން ދިޔަ ހުރިހާ ލީޑަރުން ޖަލަށް ލާފައިވާއިރު އަދީބުވެސް ވަނީ 2018 ވަނަ އަހަރުގެ ފެބްރުއަރީ އެއްވަނަ ދުވަހު ސުޕްރީމް ކޯޓުން ކުރި ހުކުމުގައި މިނިވަން ކުރަން އެންގި ލިސްޓުގައި ހިމެނިފައެވެ. ނަމަވެސް ޔާމީން ވަނީ ބާރުގެ ބޭނުން ކުރައްވައި އަދީބާއި އެހެނިހެން ލީޑަރުން މިނިވަން ނުކޮށް ކުއްލި ހާލަތު އިއުލާން ކުރައްވާފައެވެ.