އަނބިމީހާ ލައްވައި ގަދަކަމުން ހަށި ވިއްކުވި ބިދޭސީއަކު ފުލުހުން ހައްޔަރު ކޮށްފިއެވެ.
ފުލުހުން ބުނީ މިމަހުގެ 20 ވަނަ ދުވަހު މައްޗަންގޯޅި ގެއެއްގައި ހަށިވިއްކާކަމަށް ފުލުހުންނަށް ލިބުނު މައުލޫމާތަކާއި ގުޅިގެން ކޯޓު އަމުރެއްގެ ދަށުން އެގެ ބަލައި ފާސްކޮށް ތިން ފިރިހެނަކު ހައްޔަރުކޮށްފައިވާ ކަމަށެވެ. އެތިން މީހުންނަކީވެސް ބަންގްލަދޭޝްގެ ތިން ފިރިހެނުންކަމަށް ފުލުހުން ބުނެއެވެ.
ފުލުހުން ބުނި ގޮތުގައި އެ އަންހެން މީހާ ލައްވައި ހަށި ވިއްކަނީ އޭނާގެ ފިރިމީހާ އެވެ. އަދި އެ އަންހެން މީހާއަށް ފިރިމީހާ އަނިޔާކޮށްފައިވާ ކަމުގެ ނިޝާންތައް ވެސް އެބަހުރި ކަމަށެވެ. އަންހެން މީހާގެ ޕާސްޕޯޓް ވެސް ފިރިމީހާ ހިފައިގެން ގޮސްފައިވާ ކަމަށެވެ.
"މި މައްސަލާގައި އަންހެން މީހާއަށް ސޭފް ހައުސް ހަމަޖެހިފައިވަނީ 23 މެއި ގައި، އަދި ހަމަ އެ ދުވަހު އޭނާ ސޭފް ހައުސްއަށް ބަދަލުކުރެވިފައިވަނީ، އޭގެ ކުރިން އަންހެން މީހާ ހުރީ ފުލުހުންގެ ބެލުމުގެ ދަށުގައި،" ފުލުހުން ބުންޏެވެ.
ފުލުހުން ބުނީ އެ އަންހެން މީހާގެ ފިރިމީހާގެ މައުލޫމާތު އިމިގްރޭޝަނާއި ހިއްސާކޮށް އޭނާ ހޯދުމުގެ މަސައްކަތް ކުރަމުން ދަނިކޮށް އޭނާ ފުރަން އެއާޕޯޓުގައި ހުއްޓާ އަތުލައިގެންފައިވާ ކަމަށެވެ.
މި މައްސަލާގައި އަންހެން މީހާގެ ފިރިމީހާގެ ބަންދަށް 7 ދުވަސް ކްރިމިނަލް ކޯޓުން ދީފައިވާއިރު ހައްޔަރު ކުރި އަނެއް ތިން މީހުންގެ ބަންދަށް 15 ދުވަސް ޖަހާފައިވާކަމަށް ފުލުހުން ބުނެއެވެ.
މިމައްސަލަ އިތުރަށް ފުލުހުން ދަނީ ތަހްގީގު ކުރަމުންނެވެ.