ކުރީގެ ނައިބު ރައީސް އަހުމަދު އަދީބާ ދެކޮޅަށް ދައުވާ ކޮށްދިނުމަށް އެދި ޕްރޮސެކިއުޓާ ޖެނެރަލްގެ އޮފީހުން ކްރިމިނަލް ކޯޓަށް ފޮނުވާފައިވާ 12 މައްސަލައެއް ކްރިމިނަލް ކޯޓުގެ ގާޒީ އަހުމަދު ހައިލަމް އިސްކޮށް ހުންނަވައިގެން އަލުން ބެލުމަށް ޕީޖީ އަށް ފޮނުވައިފިއެވެ.
ކްރިމިނަލް ކޯޓުގެ ފަނޑިޔާރުންގެ ބައްދަލުވުމެއްގައި މި މައްސަލަތައް އަނބުރާ ޕީޖީ އަށް ފޮނުވާލަން ހުށައަޅާފައިވާއިރު ހުށައެޅުއްވީ ގާޒީ ހައިލަމް ކަމަށް "މިހާރު" ނޫހުން ރިޕޯޓުކޮށްފައިވެއެވެ. އަދީބާ ދެކޮޅަށް ކޮށްފައިވާ ތިން ޖަލު ހުކުމެއް ކައިރި ކައިރީގައި ސުޕްރީމް ކޯޓުން ވެސް ވަނީ ބާތިލުކޮށް އަލުން ބެލުމަށް ނިންމާފައެވެ.
ޚަބަރު ލިބޭ ގޮތުގައި ޕީޖީގައި އޮތް 12 މައްސަލަ ވެސް އަނބުރާ ފޮނުވާލާފައިވަނީ އެ މައްސަލަތަކުގައި ފަނޑިޔާރުންގެ ނުފޫޒު ހިމެނޭ ކަމަށް ބުނެއެވެ. ޕީޖީން ވަނީ ނިމިގެން ދިޔަ ރައިސް ޔާމީންގެ ވެރިކަމުގައި އެމްއެމްޕީއާރްސީ ބޮޑު ޚިޔާނާތުގެ ވަރަށް ގިނަ މައްސަލަތަކެއް އަދީބާ ދެކޮޅަށް ސާބިތުވާ ކަމަށް ބުނެ ދައުވާ ކުރަން ފޮނުވާފައެވެ.
ނަމަވެސް އެމްއެމްޕީއާރްސީ ޚިޔާނާތާ ގުޅިގެން ހިންގުނު މިނިވަން ތަހުގީގުތަކުން ވަނީ ޚިޔާނާތުގައި ކުރީގެ ރައީސް ޔާމީންވެސް ބައިވެރިވެފައިވާ ކަމަށް ދޭހަވާ ހެކިތައް ހުރި ކަމަށް ހާމަކޮށްފައެވެ. އެގޮތުން އަދީބުގެ އަމިއްލަ ފޯނުން ރައީސް ޔާމީނަށް ކޮށްފައިވާ މެސެޖުތަކުން ނުއަގުގައި ރަށްތައް ވިއްކާފައިވަނީ އެމަނިކުފާނަށް އެނގިގެން ކަމަށް ފާހަގަކޮށްފައިވެއެވެ.
ޔާމީނާ ދެކޮޅަށް ވަނީ އެމްއެމްޕީއާރްސީ ފައިސާގެ ތެރެއިން ފައިސާ އެމަނިކުފާނުގެ އަމިއްލަ އެކައުންޓަށް ވަދެފައިވާތީ މަނީ ލޯންޑަރިންގެ ދައުވާ އުފުލާފައެވެ.