އާ މަޖިލީހުގެ ދާއިމީ ކޮމިޓީތައް ހަދަން އިދިކޮޅު މެމްބަރުންނާ މަޝްވަރާ ކޮށްފައިނުވާ ކަމަށް ނައިފަރު ދާއިރާގެ ޕީޕީއެމް މެމްބަރު އަހުމަދު ޝިޔާމް ވިދާޅުވެއްޖެއެވެ.
ޝިޔާމް މިހެން ވިދާޅުވެފައިވަނީ އެމްޑީޕީގެ ފަރާތުން ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް، ކޮމިޓީތައް ހެދުމުގެ މަޝްވަރާތައް ފެށިފައިވާ ކަމަށް ވިދާޅުވުމުން އަސްލަމަށް ރައްދު ދެއްވަމުންނެވެ. އަސްލަމް ވިދާޅުވީ މަޖިލީހުގައި ހިމެނޭ އެހެން ޕާޓީތަކުގެ ލީޑަރުންނާ އެކު ކޮމިޓީތައް ހެދުމުގެ މަޝްވަރާ ފެށި، ކުރިއަށް ދާ ކަމަށެވެ.
ނަމަވެސް ޝިޔާމް ވަނީ އަސްލަމް އެހެން ވިދާޅުވި ނަމަވެސް އިދިކޮޅު މެމްބަރުންނާއެކު އެއްވެސް މަޝްވަރާއެއް ކުރެއްވި ކަމެއް އެނގިފައިނުވާ ކަމަށެވެ. ޝިޔާމަކީ ޕީޕީއެމްގެ ނައިބު ރައީސްކަން ވެސް ކުރައްވާ ބޭފުޅެކެވެ. އަދި އާ މަޖިލީހަށް އިންތިޚާބުވި އެޕާޓީގެ މަދު މެމްބަރުންގެ ތެރޭގައި ހިމެނޭ ޝިޔާމް، ޕީޕީއެމްގެ ޕީޖީ ލީޑަރުކަމަށް އަތުވެދާނެ ކަމަށް ވެސް ވަނީ އަޑު ފެތުރިފައެވެ.
މަޖިލީހުގައި 13 ކޮމިޓީއެއް އެކުލަވާލެވި މެމްބަރުން އައްޔަން ކުރެވޭއިރު މިހާތަނަށް މަޖިލީހުގެ ފުރަތަމަ ޖަލްސާގައި ވަނީ ޚާއްސަ ކޮމިޓީއެއް އެކުލަވާލާފައެވެ. އެއީ މަޖިލީހުގެ ގަވާއިދު ބަދަލުކުރުމަށް އެކުލަވާލެވުނު 11 މެމްބަރުންގެ ކޮމިޓީއެކެވެ. ކޮމިޓީގެ މުގައްރިރަކީ މަރަދޫ ދާއިރާގެ މެމްބަރު އިބްރާހިމް ޝަރީފެވެ.