މިދިޔަ އަހަރުގެ ފެބްރުއަރީ މަހުގެ 8 ވަނަ ދުވަހު އައްޑޫގައި ހިންގި "ބޮޑު ހުޅު" ހާދިސާގައި ސ. ގަން ޕޮލިސް ސްޓޭޝަނަށް ގެއްލުންދީ ފުލުހުންނަށް ހަމަލާ ދިންކަމުގެ ދައުވާލިބޭ ތިން ކުއްޖަކަށް ހުކުމް އިއްވުން ފަސްކޮށްފި އެވެ.
އެ ތިން ކުދިންގެ ތެރެއިން ދެ ކުއްޖަކަށް ދައުވާކޮށްފައި ވަނީ އެ ދުވަހު ގަމަށް އެރުމަށް އޮންނަ ކޯޒްވޭ މަތީގައި ސަފަކަށް އެތުރިގެން ތިބެ ފުލުހުންނާއި ސިފައިންނަށް ހަމަލާދީފައިވާތީ ކަމަށް ބުނެ އެވެ.
އަނެއް ކުއްޖާގެ މައްޗަށް ދައުވާ ކުރަނީ ކޯޒްވޭ މަތީގައި ހުރެގެން ފުލުހުންނަށް ހަމަލާ ދިނުމުގެ އިތުރަށް ގަން ޕޮލިސް ސްޓޭޝަންގެ އިމާރާތަށް ގެއްލުން ދިން ކަމުގެ ތުހުމަތުގަ އެވެ.
އެ ތިން ކުދިންގެ މައްސަލައަކީ ހުޅުޖެހި ހާދިސާތަކާ ގުޅިގެން ޓެރަރިޒަމްގެ ދައުވާ އުފުލާފައިވާ މީހުންގެ ތެރެއިން ނިމުމަކާ އެންމެ ގާތުގައި އޮތް މައްސަލަ އެވެ. އެހެން މައްސަލަތައް ހުރީ ހެކި ބަސް ނެގުމުގެ މަރުހަލާގަ އެވެ.
މި މައްސަލާގައި ކުރިން ހުކުމް އިއްވާ ގޮތަށް އޮތީ މިދިޔަ ބުރާސްފަތި ދުވަހު އެވެ.
ކުރީގެ ރައީސް މުހައްމަދު ނަޝީދު ވެރިކަމުން އިސްތިިއުފާ ދެއްވި ދުވަހުގެ ފަހު ދު ދުވަހު ހިންގި ހުޅުޖެހި ހާދިސާތަކާ ގުޅިގެން 200 އާ ގާތްކުރާ އަދަދެއްގެ މީހުންގެ މައްޗަށް ޓެރަރިޒަމްގެ ދައުވާ ކުރަން ޕްރޮސިކިއުޓާ ޖެނެރަލް (ޕީޖީ) ވަނީ ކްރިމިނަލް ކޯޓަށް ފޮނުވާ އެވެ.
މީގެ ތެރޭގައި އައްޑޫގެ ރައްޔިތުންގެ މަޖިލީހުގެ މެމްބަރަކާއި އައްޑޫގެ ކައުންސިލަރަކު ވެސް ހިމެނެ އެވެ.