މިދިޔަ ބުރާސްފަތި ދުވަހު ކެމްޕޭނަށް ރައީސް ޑރ. މުހައްމަދު ވަހީދު އައްޑު އަށް ވަޑައިގެން ހުކުރު ދުވަހު މެންދުރު ގަމުން ފުރާވަޑައިގަތުމަށް އެއާޕޯޓްގެ "ވީއައިޕީ" ލައުންޖް ބޭނުން ކުރެއްވުމަށް އެދި ވަޑައިގަތުމުން އެތަން ހަމަ ނުޖެހިގެން ޑޮމެސްޓިކް ޓާމިނަލުން ފުރާވަޑައިގަންނަވަން ޖެހިއްޖެ އެވެ.
"އައްޑޫ ލައިވް" އަށް އެނގިފައިވާ ގޮތުގައި ގަމުގެ ވީއައިޕީ ލައުންޖް ހޯދުމަށް އެމްއެންޑީއެފް އިން އެދުމުން ރައީސް ޑރ. ވަހީދު ނޫން މީހަކަަށް އެފުރުސަތު ހަމަނުޖެހުނު ކަމަށް ވެ އެވެ. އެހެންވެ ރައީސް ވީއައިޕީ ބޭނުން ނުކުރައްވާ ފުރާވަޑައިގެން ފައިވަނީ ޑޮމެސްޓިކް ޓާމިނަލުންނެވެ.
ރައީސް ވަހީދު އާއި ރަނިންމޭޓް އަހުމަދު ތަސްމީނު އަލީ އާއި "ގައުމައިގެން ކުރިއަށް" ކެމްޕޭން ޓީމު އައްޑު އަށް ވަޑައިގަތީ އެއާޕޯޓްގެ ވީއައިޕީންނެވެ. އަދި އެމަނިކުފާނާއި ޓީމަށް މަރުހަބާ ދެންނެވުމަށް ވަޑައިގަތް ސަޕޯޓަރުން ވަނީ ވީއައިޕީ ސަރަހައްދަށް ވައްދާފަ އެވެ.
އެ ދުވަހު ފުރަތަމަ ރައީސަށް މަރުހަބާ ކިޔަން ހަމަޖެހިފައި އޮތީ އިންޓަނެޝަނަލް ޓާމިނަލުންނެވެ. އެގޮތުން އެ ސަރަހައްދުން ރައީސަށް މަރުހަބާ ކިއުމަށް ޓާމިނަލް ބޭރުގައި ސަފު ވެސް ހަދާފައިވެ އެވެ. އެކަމަކު ކުޑަ އިރުކޮޅެެއް ފަހުން، މަރުހަބާ ކިޔަން ދިޔަ މީހުން ވީއައިޕީ ލައުންޖާ ދިމާއަށް ބަދަލު ކުރި އެވެ.
ކުރީގެ ރައީސް މުހައްމަދު ނަޝީދުގެ ސަރުކާރުން 17 ވަަނަ ސާކް ސަމިޓަށް އިމާރާތް ކުރި ވީއައިޕީ ލައުންޖް ވަނީ ޝަންގްރިއްލާ އަށް އައްޑޫ އިންޓަނެޝަނަލް އެއާޕޯޓުން ދީފަ އެވެ. ނަމަވެސް ވީއައިޕީ އަށް އެމްއެންޑީއެފް އިން އެދިއްޖެ ހާލަތެއްގައި ދިނުމަށް ޝަރުޠުކޮށްފައިވާ ކަމަށް މައުލޫމާތު ލިބިފައިވެ އެވެ.