މި އަހަރު ބޭއްވުމަށް ހަމަޖެހިފައިވާ ރިޔާސީ އިންތިޙާބު ކައިރިވަމުން އަންނާތީ ޕާޓީތަކުން އެ ޕާޓީތަކުގެ މެނިފެސްޓޯ އާއި ބެނާތައް ޖެހުމުގެ އިތުރުން ތަފާތު ހަރަކާތް ތައް ހިންގަމުން ދާތަން ފެންނަން ފަށައިފި އެވެ.
ހާއްސަކޮށް މަގުތަކުގައި ޕާޓީތަކުގެ ކުލަ ލުމުގެ ކަންތައްތައް ކުރާތަން މިހާރުވަނީ އާންމުވެފަ އެވެ. ނަމަވެސް ހިތާމައަކީ ސަރުކާރުގެ އިމާރާތްތަކާއި ބައެއް ތަންތަނުގައި "ޕާޓީ ކުލަ" ޖައްސަން ބައެއް ފަރާތްތަކުން މަސައްކަތް ކުރަމުންދާތީ އެވެ.
ސަރުކާރުގެ އޮފީސްތަކަކީ ވެސް ނުވަތަ އިމާރާތްތަކަކީ ވެސް އެއްވެސް ޕާޓީއެއްގެ ތަނެއް ނޫނެވެ. އެއީ ރައްޔިތުން ހިދުމަތް ލިބި ގަންނަން ހުންނަ ތަންތަނެވެ.
ސަރުކާރު ހިންގާ ބަޔަކު ވެސް ނުވަތަ އިދިކޮޅު ޕާޓީއެއްގެ ބަޔަކު ވެސް މިފަދަ އަމަލުތައް ކުރަން ފަށައި ފިނަމަ ނޭދެވޭ އަސަރުތަކެއް ދާދި އަވަހަށް ފެންނަން ފަށާނެ އެވެ.
އެންމެ ބޮޑު އަސަރެއް ކުރާނީ ޒުވާނުންނޭ ދެއްނެވުމަކުން ގޯހަކަށް ނުވާނެ އެވެ. ޕާޓީތަކުގެ އިސް ސަފުގައި ޒުވާނުން އުޅެމުންދާ އިރު އެއް ޕާޓީން ކުރާ ކިތައްމެ ކުޑަ ކަމަކުން ވެސް ހިތަށް ނުގެނެވޭނެހާ ވެސް ބޮޑު ކަމަކާއި ކުރިމަތިލާން ޖެހި ދާނެ އެވެ.
ސަރުކާރުގެ އަދި އެކި މުއައްސަސާ އަށް ނިސްބަތް ކުރެވޭ ފާރުފާރުގައި ޕާޓީ ކުލަ ލުމަކީ އިލެކްޝަންސް ކޮމިޝަނުގެ ގަވާއިދުތަކާ ޚިލާފް ވެސް ކަމެކެވެ.
ދައުލަތުގެ އެއްވެސް ޢިމާރާތެއްގައި ޕާޓީގެ ކުލަ ލުން، ޕޯސްޓަރު، ނިޝާން، ބެނަ ފޮތި ދެމުން ފަދަ ސިޔާސީ ޕާޓީއަކަށް ނިސްބަތް ކުރެވޭ އެއްވެސް ހާމަ ކުރުމެއް މަނާ ކުރެވިފައިވާ އިރު ސަރުކާރުން މި ކަމުގައި ވަރަށް ބޮޑަށް ފަރުވާތެރި ވާން ޖެހެ އެވެ.
ރައްޔިތުން ބޭނުމީ މުޅި ޤައުމަށް ޢާއްމު ތަރައްޤީ އާއި ފާގަތިކަން ލިބޭނެ ގޮތްތަކެއް ކަމަށް ވާއިރު ތަނެއްގައި ކުލަ ބަދަލު ކުރުމުން ނުވަތަ ދިދަ ފައްޗެއް ދަމާފައި ހުރުމަކުން އަދި ފުދުނީކީ ނޫނެވެ.
ރައްޔިތުން ހަމަ ގައިމުވެސް ވޯޓު ލާންދާ އިރު ވޯޓު ކަރުދާހުގައި ކެންޑިޑޭޓުންގެ ނަމުގެ ބަދަލުގައި ވަކި ކުލައެއް ޖަހާފައި ނޯންނާނެ އެވެ.
ވޯޓު ކަރުދާހުގައި އޮންނާނީ ކެންޑިޑޭޓުންގެ ނަމެވެ. ވީ އިރު ކުލައަކުން އެއްވެސް ފައިދާއެއް ރައްޔިތުންނަކަށް ނުކުރާނެ އެވެ.