އިރާނުގެ ރައީސް ކަމަށް އިންތިޚާބުވެވަޑައިގެންނެވި ޙަސަން ރޫޙާނީ އަށް ރައީސް ޑރ. މުހައްމަދު ވަޙީދު ތަހުނިޔާ ވިދާޅުވެއްޖެ އެވެ.
ރައީސްގެ މެސެޖުގައި، ދިވެހި ސަރުކާރާއި ރައްޔިތުންގެ ނަމުގައި އަދި ރައީސްގެ އަމިއްލަ ނަންފުޅުގައި، ޙަސަން ރޫޙާނީ އަށް މަރްޙަބާ ވިދާޅުވެ، ހެޔޮއެދުންތައް ފޮނުއްވާފައިވެ އެވެ.
ރައީސްގެ މެސެޖުގައި، މި އިންތިޚާބުގެ ނަތީޖާއިން ފެނިގެން ދިޔައީ، އިރާނުގެ ރައްޔިތުން ރޫޙާނީއަށް ކުރައްވާ އިތުބާރާއި ތާއީދު ކަމުގައި ވިދާޅުވެފައިވެ އެވެ.
އަދި އެ މަނިކުފާނުގެ ޒަޢާމަތުގައި، ޤައުމީ އަދި ބައިނަލްއަޤްވާމީ ގޮތުން އިރާނުގެ ރައްޔިތުންނަށް އިތުރު ފާގަތިކަމާއި ކުރިއެރުން ލިބިގެން ދާނެ ކަމަށް އުންމީދު ކުރައްވާ ކަމުގައި ވެސް ރައީސް ވިދާޅުވެފައި ވެ އެވެ.
ދިވެހި ރާއްޖެ އާއި އިރާނާ ދެ ޤައުމުގެ ދެމެދުގައި ޒަމާނުއްސުރެ އޮތް އަޚްވަންތަކަމުގެ ގުޅުން، ކުރިއަށް އޮތް އަހަރުތަކުގައި އިތުރަށް ބަދަހިވެގެން ދާނެކަން ޔަޤީން ކުރައްވާ ކަމުގައިވެސް ރައީސްގެ މެސެޖުގައި ވިދާޅުވެފައި ވެ އެވެ.