މިހާރުގެ ސަރުކާރުން އައްޑޫ ތަރައްގީ ކުރަން މަސައްކަތް ކުރާތީ ބަޔަކު ވަރަށް ކަންބޮޑުވެގެން އުޅޭ ކަމަށް ހައުސިން މިނިސްޓަރު ޑރ. މުހައްމަދު މުއިއްޒު ވިދާޅުވެއްޖެ އެވެ.
މިނިސްޓަރު ވިދާޅުވީ އައްޑޫގެ ހަތަރު ރަށެއްގެ ބިން ކޮންޓްރެކްޓަ ފައިނޭންސް އުސޫލްގެ ދަށުން ހިއްކައި ދިނުމަށް ޝައުގުވެރިވާ ބަޔަކު ހޯދަން ހުޅުވާލުމުން އެއީ ގާނޫނާ ހިލާފުކަމެކޭ ކިޔައިގެން ބައެއް މީހުން ހަގީގަތެއް ނެތް ވާހަކަތަކެއް ވެސް ދައްކަމުން ގެންދާ ކަމަށެވެ.
މިނިސްޓަރު ވިދާޅުވީ ބިން ހިއްކުމުގެ މަޝްރޫއާ ބެހޭ ގޮތުން އެންޓި ކޮރަޕްޝަން ކޮމިޝަން (އޭސީސީ) އަށް ބަޔަކު ޝަކުވާ ހުށަހެޅުމުން އެކަން މަޑުޖައްސާލަން އަންގާ ސިޓީއެއް ފޮނުވާފައިވާ ކަމަށް މިނިސްޓަރު ވިދާޅުވި އެވެ.
ޑރ. މުއިއްޒު ވިދާޅުވީ އެކަމާ ގުޅިގެން މިހާރު އޭސީސީ އަށް ސިޓީއެއް ފޮނުވާފައިވާ ކަމަށެވެ. މިނިސްޓަރު އިތުރަށް ވިދާޅުވީ މިހާތަނަކަށް އަދި ބަޔަކާ މަސައްކަތެއް ހަވާލު ކުރީކީ ވެސް ނޫން ކަމަށާއި ހަމައެކަނި ކުރި ކަމަކީ ކޮންޓްރެކްޓަ ފައިނޭންސްގެ ދަށުން ބިން ހިއްކައި ދިނުމަށް ޝައުގުވެރިވާނެ ބަޔަކު ހޯދަން ހުޅުވާލުން ކަމަށެވެ. އަދި މިކަމުގައި ގާނޫނާ ހިލާފްވާ ގޮތަށް ކުޑަ ނަމަވެސް ކަމެއް ކޮށްފައި ނުވާނެ ކަމަށް މިނިސްޓަރު ވިދާޅުވި އެވެ.
ޑރ. މުއިއްޒު ވިދާޅުވީ ކޮންޓްރެކްޓަ ފައިނޭންސްގެ ދަށުން ބިން ހިއްކަން ޝައުގުވެރިވާނެ ބަޔަކު ހޯދުމަށް ފަހު، ދެން ހުޅުވާލާނީ ރިކްއެސްޓް ފޯ ޕްރޮޕޯސަލް (އާރްއެފްޕީ) އަށް ކަމަށެވެ.
މިނިސްޓަރު ވިދާޅުވީ އޭގެ ފަހުން ދެން ޕްރޮޕޯސަލް ހުށަހެޅުމުން ފިނޭންސް މިނިސްޓްރީގެ ޓެންޑަ ބޯޑުން އިވެލުއޭޓްކޮށް އެންމެ ރަނގަޅު ފަރާތަކާ ބިން ހިއްކަން ހަވާލު ކުރާނީ ކަމަށެވެ. އަދި ބިން ހިއްކަން ބަޔަކާ ހަވާލުކުރާނީ މިކަމަށް ހޮވޭ ފަރާތުން ފުރަތަމަ ކުރަން ޖެހޭ ހުރިހާ ހަރަދެއް ކުރާ ގޮތަށް ކަމަށް ވެސް މިނިސްޓަރު ވިދާޅުވި އެވެ.
ޑރ. މުއިއްޒު ވިދާޅުވީ ސަރުކާރުން މި މަޝްރޫ އަށް ހަރަދު ކުރަން ފަށާނީ އަންނަ އަހަރުގެ ތެރޭގައި ކަމަށެވެ. އެއީ އަންނަ އަހަރުގެ ބަޖެޓްގައި އައްޑޫގެ ބިން ހިއްކަން ފައިސާ ހިމަނައިގެން ކަމަަށެވެ. އެހެންވީމާ މިއީ ފިނޭންސާއި ހައުސިން މިނިސްޓްރީ ވެސް ގުޅިގެން ކުރިއަށް ގެންދެވޭނެ މަޝްރޫއެއް ކަމަށް މިނިސްޓަރު ވިދާޅުވި އެވެ. އަދި މި އަހަރުގެ ބަޖެޓުން މިކަމަށް އެއްވެސް ހަރަދެއް ކުރަން ހަމަޖެހިފައި ނުވާ ކަމަށް ވިދާޅުވި އެވެ.
"ބަޔަކަށް ވަރަށް ބޮޑަށް އޮޅިގެން އެ އުޅެނީ. އަޅުގަނޑުމެން ކަންކަން ކުރަނީ ގާނޫނާއި ގަވައިދުތައް ވަރަށް ރަނގަޅަށް އެނގިގެން، ގާނޫންތަކާ އެއްގޮތަށް. ވެގެން މި އުޅޭ ގޮތަކީ އަޅުގަނޑުމެން އައްޑޫ ތަރައްގީކުރަން އުޅޭތީ ބަޔަކު ކަންބޮޑު ވަނީ،" މުއިއްޒު ވިދާޅުވި އެވެ.
އައްޑޫގެ ހަތަރު ރަށެއްގެ ބިން ހިއްކަން ހައުސިން މިނިސްޓްރީން ބީލަމަށް ހުޅުވާލުމުން މާލިއްޔަތު ކޮމިޓީން ވަނީ މި އަހަރުގެ ބަޖެޓްގައި އެކަން ހިމަނާފައި ނެތުމުން އެއީ މާލިއްޔަތު ގާނޫނުން ތަން ދޭ ކަމެއް ނޫން ކަމަށް ބުނެފަ އެވެ.
ފިނޭންސް މިނިސްޓަރު އަބްދުﷲ ޖިހާދު ވިދާޅުވެފައި ވަނީ ބިން ހިއްކަން އިއުލާން ކުރީ އެ މިނިސްޓްރީގެ ހުއްދަ ވެސް ނެތި ކަމަށެވެ.
ހައުސިން މިނިސްޓްރީން ނިންމާފައި ވަނީ ހިތަދޫން 17.7 ހެކްޓަރު، ފޭދޫން 41 ހެކްޓަރު އަދި މަރަދު އާއި މަރަދޫފޭދޫން 75 ހެކްޓަރު ބިން ހިއްކާށެވެ. އަދި އިތުރު ފިޔަވައްސެއްގައި ހިތަދޫން އިތުރަށް ބިން ހިއްކާނެ ކަމަށް ވެސް ހައުސިން މިނިސްޓަރު ވިދާޅުވި އެވެ.