ސ. ހިތަދޫގައި ގައުމީ ޔުނިވަސިޓީގެ ކޯސްތައް ހިންގަން ތިން ބުރީގެ ކްލާސްރޫމް ބްލޮކެއް އެޅުމަށް މިއަދު ބަޔަކާ ހަވާލުކޮށްފި އެވެ.
ޔުނިވަސިޓީގެ ފަރާތުން މި އެއްބަސްވުމުގައި ސޮއިކުރެއްވީ ޑެޕިއުޓީ ޗާންސެލާ ހަސަން ހަމީދެވެ. މަސައްކަތް ހަވާލުކޮށްފައިވާ ބީއޭޕީސީ ކުންފުނީގެ ފަރާތުން ސޮއިކުރެއްވީ މެނޭޖިން ޑިރެކްޓަރު މުހައްމަދު އަބްދުﷲ އެވެ.
އެއްބަސްވުމުގައި ސޮއި ކުރެއްވުމަށް ފަހު ހުސެއިން ހަލީމް ވިދާޅުވީ 300 ދުވަހުގެ ތެރޭގައި އިމާރާތްކޮށް ނިންމުމަށް ބީއޭޕީސީއާ ހަވާލުކޮށްފައި ވަނީ 9.7 މިލިއަން ރުފިޔާ އަށް ކަމަށެވެ. އަދި ހިތަދޫ ކެމްޕަސް އަށް މި ބްލޮކް އިތުރު ކުރުމުން ޖާގައިގެ ދަތިކަން ކޮންމެވެސް ވަރަކަށް ހައްލުވެގެން ދާނެ ކަމަށް އޭނާ ވިދާޅުވި އެވެ.
ހަލީމް އިތުރަށް ވިދާޅުވީ އައްޑޫގައި ކޯސްތައް ހިންގުމަށް ޖާގައިގެ ދަތިކަން މިހާރު ވެސް ވަރަށް ބޮޑު ކަމަށާއި ބައެއް ކްލާސްތައް ހިންގަނީ ޝަރަފުއްދީންގެ ކްލާސްތައް ކުއްޔަށް ނަގައިގެން ކަމަށާއި އާ އިމާރާތް ލިބުމުން އާ ކޯސްތައް ފެށުމަށް ވެސް މަގުފަހިވެގެން ދާނެ ކަމަށެވެ.
މި އިމާރާތުގައި ހަ ކްލާސްރޫމްގެ އިތުރުން ސައިންސް ލެބަކާއި އިތުރު ލެބޯޓްރީއެއް ގާއިމުކުރުމަށް ހަމަޖައްސާފައިވާ ކަމަށް ވެސް ޔުނިވަސިޓީން ބުންޏެވެ.