ފުރަތަމަ މެޗް ގޯދިއްޔާ އަށް، ދެވަނަ މެޗް ޖީއައިއޭ އަށް

ރޭ ފޭދޫ ބޯޅަ ދަނޑުގައި ފެށި ފްލައިމީ އައްޑޫ ފުޓްސަލް މުބާރާތުގެ ފުރަތަމަ މެޗް ގޯދިއްޔާއިން ކާމިޔާބްކޮށްފި އެވެ.

ދި ފޭދޫ ސްޕޯޓްސް އާއި ބައްދަލުކޮށް ގޯދިއްޔާ އިން މެޗް ގެންދިޔައީ 6-0 ލަނޑުންނެވެ.

މުބާރާތުގެ ހުޅުވުމުގެ ރަސްމިއްޔާތަށް ފަހު ކުޅުނު މެޗްގައި ފޮރި ގަދަ ކުޅުމެއް ވަނީ ފެނިގެން ގޮސްފަ އެވެ. އެގޮތުން ގޯދިއްޔާގެ ޝިއުސް (ބުއްލީ) އާއި އިބްރާހިމް ރިޒްވާން (ބަގޭ)ގެ ކުޅުން ފާހަގަކޮށްލެވެ އެވެ.

މެޗްގައި ޖެހި 6 ލަނޑުގެ ތެރެއިން 3 ލަނޑު ޖެހީ މެޗްގެ މޮޅު ކުޅުންތެރިއާގެ މަގާމު ހޯދި އިބްރާހިމް ރިޒްވާން (ބަގޭ) އެވެ. އަދި ޝިއުސް 2 ޖެހި އިރު އިބްރާހިމް ސައިފް އެއް ލަނޑު ޖަހާފަ އެވެ.

މުބާރާތުގެ ދެވަނަ މެޗްގައި ގަން އިންޓަނޭޝަނަލް އެއާޕޯޓް (ޖީއައިއޭ) ޓީމާއި މަރަދޫ ސޮބާހް މެމޯރިއަލް ޓީމް (އެސްއެމްޓީ) ބައްދަލު ކުރި މެޗް 1-0 ލަނޑުން ކާމިޔާބު ކުރީ ގަން އިންޓަނޭޝަނަލް އެއާޕޯޓްގެ ޓީމެވެ.

މެޗްގެ ހަމައެކަނި ލަނޑު ޖީއައިއޭ އަށް ޖަހައި ދިނީ އެ ޓީމުގެ ޖޯޒީ ނަންބަރު 10 މުހައްމަދު ފަޒީލް އެވެ. މެޗްގެ މޮޅު ކުޅުންތެރިއަކަށް ހޮވިފައި ވަނީ އެއާޕޯޓުގެ ޖޯޒީ ނަންބަރު 6 ހުސެއިން ލަޠީފް(ކާލޯސް) އެވެ.

މިރޭވެސް މި މުބާރާތުގެ ދެ މެޗްކުޅުމަށް ވަނީ ހަމަޖެހިފަ އެވެ. އެގޮތުން މިރޭ 9:00 ޖަހާ އިރު ފަށާ ފުރަތަމަ މެޗްގައި ބައްދަލު ކުރާނީ ހިތަދޫ ޔަޝީ އާއި ފޭދޫ ޔަންގް މެޖެންޓާ އެވެ. އަދި 10:00 ޖަހާ އިރު ފަށާ މެޗްގައި ބައްދަލު ކުރާނީ ހިތަދޫ މަލްޓި ޖީނިއަސް ސިޓީ އާއި ފޭދޫ ހޫރު ޝަހަރެވެ.