ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް، ދާއިރާގެ ރައްޔިތުންނާ ބައްދަލުކުރެއްވުމަށް ނިންމަވައިފިއެވެ.
ރައްޔިތުންގެ މަޖިލިސް މެމްބަރެއްގެ ގޮތުގައި 15 އަހަރު ހޭދަކުރައްވާފައިވާ އަސްލަމް މިފަހަރުވެސް ދާއިރާއަށް ވާދަކުރައްވާ ވަނީ ގޮނޑި ކާމިޔާބުކުރައްވާފައެވެ.
ދާއިރާގެ ރައްޔިތުންނާ އަސްލަމް ބައްދަލުކުރެއްވުމަށް ހަމަޖެހިފައިވަނީ މިރޭ 8:30 ގައި ހިތަދޫ ސްކޫލުގައެވެ. މި ބައްދަލުވުމުގައި ދާއިރާގެ ރައްޔިތުން ބައިވެރިވެ ޝަކުވާތަކާއި ކަންބޮޑުވުންތައް ހުށައެޅުމަށް އަސްލަމް ވަނީ އެދިވަޑައިގެންފައެވެ.
ވާދަވެރި ކެމްޕޭނަކަށް ފަހު އަސްލަމް ގޮނޑި ކާމިިޔާބުކޮށްފައިވާއިރު ރައްޔިތުންގެ މަޖިލިސްގެ ރައީސްގެ މަގާމަށް ވެސް ވާދަކޮށް ވަރުގަދަ ކެމްޕޭނެއް ވެސް ވަނީ ކޮށްފައެވެ. ނަމަވެސް ޕާޓީގައި ބައިބައިވުން އުފެދިދާނެ ކަމަށް ބެލެވޭތީ އަސްލަމް ވަނީ ވާދަކުރެއްވި ވިލުފުށި ދާއިރާގެ މެމްބަރު ހަސަން އަފީފާއި މަޝްވަރާ ކުރުމަށް ފަހު ކުރީގެ ރައީސް ނަޝީދުގެ ނަން މަޖިލީހުގެ ރައީސްގެ މަގާމަށް ހުށައަޅުއްވާފައެވެ.
އަސްލަމް ގޮނޑިއަށް އިންތިޚާބުވުމަށް ފަހު ދާއިރާ ރައްޔިތުންނާ ބައްދަލުނުކުރާ ކަމަށް ބުނެ ބައެއް ފަރާތްތަކުން ވަނީ ކެމްޕޭނު ތެރޭގައި އަޑު ފަތުރާފައެވެ.
މިއީ މިފަހަރު މެމްބަރު ކަމާ ހަވާލުވުމަށް ފަހު އައްޑޫ މެމްބަރަކު ރަސްމީ ގޮތުން ރައްޔިތުންނާ ބައްދަލު ކުރައްވާ ފުރަތަމަ ފަހަރެވެ.