ކުރީ ސަރުކާރުގައި ގިނަ ދުވަސްތަކެއް ޖަލުގައި ހޭދަކުރެއްވި ކުރީގެ ނައިބު ރައީސް އަހުމަދު އަދީބުގެ ބޭސްފަރުވާއަށް މިސަރުކާރުން އިންޑިޔާއަށް ދިއުމަށް ފުރުސަތު ދިނުމުން، ފަރުވާއަށް ފަހު މިއަދު ރާއްޖެ ވަޑައިގަންނަވާނެއެވެ.
ފުރަތަމަ އަދީބަށް 10 ދުވަސް ސަރުކާރުން ދިންއިރު އަދީބުގެ އެދިލެއްވުމުގެ މަތިން ސަރުކާރުން ވަނީ އިތުރު 10 ދުވަހުގެ މުއްދަތެއް ފަރުވާގެ ކަންކަން ފުރިހަމަ ކުރުމަށް ދީފައެވެ.
އަނބިކަނބަލުންނާ އެކު އަދީބު އިންޑިޔާއަށް ފުރާފައިވާއިރު ކަރެކްޝަންސް އަދި ފުލުހުން ވެސް ވަނީ އަދީބާއެކު އިންޑިޔާއަށް ވަޑައިގެންފައެވެ. ޕޮލިސް ކޮމިޝަނަރ ހަމީދު ވަނީ އަދީބަށް ފިލަން އެއްވެސް ފުރުސަތެއް ނުދެއްވާނެ ކަމަށް ވިދާޅުވެފައެވެ.
އަދި ބޭސްފަރުވާގެ ކުރިންވެސް އެކި ފަހަރު މަތިން އަދީބު ވަނީ ފިލުމުގެ އެއްވެސް ވިސްނުމެއް ނުގެންގުޅުއްވާ ކަމަށް ވިދާޅުވެފައެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި އަދީބަށް ޖުމުލަ 33 އަހަރު ދުވަހުގެ ޖަލު ހުކުމް އިއްވާފައިވާއިރު މިސަރުކާރު އައިފަހުން ކުރެވުނު ޝަރީއަތްތަކުގައި ހުކުމް ބާތިލުކޮށް ބައެއް ޝަރީއަތް އަލުން ކުރުމަށް ވަނީ އަމުރުކޮށްފައެވެ.
ނަމަވެސް ސުޕްރީމް ކޯޓުން ވަނީ، އަދީބު ފުރި ފަހުން ޕާސްޕޯޓު ކެންސަލް ކޮށްފައެވެ.