މަނީ ލޯންޑަރިންގެ ތުހުމަތު ކުރެވޭ އެއް ފަރާތް ކަމަށްވާ ކުރީ ސަރުކާރުގެ ރައީސް އޮފީހުގެ ލީގަލް އެޑްވައިޒަރ އަދި ކުރީގެ ރައީސް އަބްދުﷲ ޔާމީންގެ ވަކީލު އާޒިމާ ޝުކޫރު ހުންނެވީ ހުޅުމާލޭގައި ކަމަށާއި ކޯޓުން ފޮނުވަން ޖެހޭ ޗިޓެއް ނުފޮނުވިގެން އުޅެނީ ކޮން ސަބަބަކާ ލައިގެންތޯ ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމް ސުވާލު އުފައްދަވައިފިއެވެ.
އާޒިމާގެ މައްޗަށް ދައުވާ ކުރަން ޗިޓު ނުފޮނުވިގެން އުޅެނީ އޭނާ އުޅޭ ތަނެއް ކޯޓަށް އެނގިފައިނުވާތީ ކަމަށާއި ޗިޓާއި ހަވާލު ނުވެގެން ކަމަށް ކްރިމިނަލް ކޯޓުން ވަނީ މީގެ ކުރިން ބުނެފައެވެ.
ރައީސް ޔާމީނާ ދެކޮޅަށް ވެސް މަނީ ލޯންޑަރިންގެ ދައުވާ އާއި ފުލުހުންނަށް ގަސްދުގައި ދޮގު މައުލޫމާތު ދިންކަމުގެ ދައުވާ ވަނީ އުފުލާފައެވެ. އެމަނިކުފާނުގެ މައްސަލަ ކުރިއަށްދާއިރު ޔާމީންގެ މައްސަލަ ނިމެންދެން ޖަލަށް ލުމަށް ކުރި ހުކުމް ހައިކޯޓުން ވަނީ ބާތިލުކޮށްފައެވެ.
ޔާމީން މިނިވަންވެ އެމަނިކުފާނު ވަނީ މިދިޔަ ބުރާސްފަތި ދުވަހު ކާނިވަލް ސަރަހައްދުގައި ބޭއްވި އިދިކޮޅު ޖަލްސާއެއްގައި ބައިވެރިވެ ވާހަކަ ދައްކަވާފައެވެ.