ފޭދޫ ހޫރު ޝަހަރު 3-1 ލަނޑުން ބަލިކޮށް ގްރޫޕް ބީގެ އެއްވަނަ އަށް މަލްޓީ ޖީނިއަސް އަރައިފި އެވެ.
ފްލައި މީ އައްޑޫ ފުޓްސަލް މުބާރާތުގެ ރޭ ކުޅުނު ދެވަނަ މެޗްގައި މަލްޓީ ޖީނިއަސް އަށް ލަނޑު ޖަހައި ދިނީ މެޗްގެ މޮޅު ކުޅުންތެރިއާގެ މަގާމު ހޯދި އަހުމަދު ސައީދް (އައްމަޓީ) އެވެ. އައްމަޓީ ވަނީ ދެ ގޯލު ޖަހާފަ އެވެ. މަލްޓީ ޖީނިއަސްގެ ތިންވަނަ ލަނޑު ޖެހީ އެޓީމްގެ ޖޯޒީ ނަންބަރު 8 އިސްމާއިލް ރަޝީދު އެވެ.
ހޫރު ޝަހަރުގެ ހަމައެކަނި ލަނޑު އެ ޓީމަށް ޖަހައި ދިނީ ޖޯޒީ ނަންބަރު 14 އަބްދުﷲ ޝިޔާޒް އެވެ.
މަލްޓީ ޖީނިއަސްގެ ޖޯޒީ ނަންބަރު 8 އިސްމާއިލް ރަޝީދު އާއި ޖޯޒީ ނަންބަރު 3 މޫސާ ޔާސިރު އަށް ރެފްރީ ވަނީ ރީނދޫ ކާޑު ދައްކާފަ އެވެ.
ގްރޫޕް ބީގެ ރޭ ކުޅުނު ފުރަތަމަ މެޗްގައި ޔަންގް މެޖެންޓާ އަދި ޔަޝީ ބައްދަލު ކުރި މެޗް ލަނޑެއް ނުޖެހި އެއްވަރު ވުމުން މި ގްރޫޕްގެ އެއްވަނަގައި މިވަގުތު އޮތީ މަލްޓީ ޖީނިއަސް އެވެ.
ކޮންމެ ގްރޫޕަކުން އެއް ވަނަ އަށް ދާ ޓީމް ސެމީ އަށް ދާ ގޮތަށް ހަމަޖެހިފައި އޮތުމުން ކޮންމެ ޓީމަކަށް ވެސް ފުރަތަމަ މެޗް ވަރަށް މުހިއްމެވެ.
35،000 ރުފިޔާގެ ފައިސާގެ އިނާމް ހުށަހަޅާފައިވާ މި މުބާރާތުގައި މިރޭ ވެސް ދެ މެޗް ކުޅޭނެ އެެވެ. މިރޭ ކުޅޭނީ ގްރޫޕް ސީގެ ދެ މެޗް އެވެ. 9:00 ގައި ފަށާ ފުރަތަމަ މެޗްގައި ބައްދަލު ކުރާނީ އެފްސީ ކަންމަތި އަދި އަބާނީ އެވެ.
ދެވަނަ މެޗްގައި ބައްދަލު ކުރާނީ އެމްސީ ޔުނައިޓެޑް އަދި މެޖެންޓާ އެވެ.