ރާއްޖޭގައި މިހާތަނަށް ހިނގި އެންމެ ބޮޑު ޚިޔާނާތް، އެމްއެމްޕީއާރުސީ ޚިޔާނާތުގައި ބޭންކް އޮފް މޯލްޑިވްސްގެ 38 މުވައްޒަފުން ޝާމިލްވާ ކަމަށް އެންޓި ކޮރަޕްޝަން ކޮމިޝަނުން ބުނެފިއެވެ.
ރައްޔިތުންގެ މަޖިލީހުގެ މާލިއްޔަތު ކޮމިޓީއަށް މިއަދު އޭސީސީގެ މެމްބަރުން ހާޒިރުކޮށް ސުވާލުކުރުމުން، ކޮމިޝަނުގެ ރައީސް މުއައްވިޒު ރަޝީދު ބުނެފައިވަނީ ބީއެމްއެލްގެ 38 މުވައްޒަފަކު އެމްއެމްޕީއާރުސީގެ ނަމުގައި ދޫކޮށްފައިވާ ޗެކުތައް އެސްއޯއެފްގެ އެކައުންޓުތަކަށް ޖަމާކުރުމުގައި ބައިވެރިވި ކަމަށެވެ.
"އައްޑޫލައިވް" އަށް އެނގިފައިވާ ގޮތުގައި ބީއެމްއެލްގެ މެނޭޖްމަންޓުން ފެށިގެން އާދައިގެ މުވައްޒަފުން ވެސް މިމައްސަލާގައި ޝާމިލް ވެފައިވެއެވެ.
އެމްއެމްޕީއާރުސީގެ ފައިސާ އެސްއޯއެފް އެކައުންޓަށް ވަންނަމުން ދިޔަ ކަން އެނގިގެން އެކަން ފަޅާއަރުވާލީ ބީއެމްއެލްގެ ނިލަންދޫ ބްރާންޗުގެ މެނޭޖަރަކަށް ހުރި ގާސިމް އަބްދުލްކަރީމެވެ. އެ މައްސަލާގައި ގާސިމް ވަނީ ހައްޔަރުކޮށް ޖަލަށް ލުމަށް ހުކުމްވެސް ކޮށްފައެވެ.
ބީއެމްއެލް އިން މިހާތަނަށް މިކަމާ ގުޅިގެން ބުނެފައިވަނީ އެބޭންކުން ކޮރަޕްޝަނުގެ މައްސަލާގައި ކަމާ ބެހޭ އިދާރާތަކަށް ދޭން ޖެހޭ ހުރިހާ އެއްބާރުލުމެއް ދީފައިވާ ކަމަށެވެ. އަދި ގާސިމް އަބްދުލްކަރީމް ބޭންކުގެ މުވައްޒަފެއްގެ ހައިސިއްޔަތުން ކޮށްފައިވަނީ ގާނޫނާ ޚިލާފު ކަމެއް ކަމަށް ބުނެފައިވެއެވެ.