އައްޑޫ ސީޓީގައި ފެން ތަޙްލީލު ކުރާ ލެބެއް ޤާއިމް ކުރުމަށް އެންވަޔަރަމެންޓް މިނިސްޓްރީން ނިންމައިފިއެވެ.
އެންވަޔަރަމެންޓް މިނިސްޓްރީން މިހެން ބުނެފައިވަނީ އައްޑޫ ސިޓީ ކައުންސިލާއެކު މިއަދު ބޭއްވި ބައްދަލުވުމުގައެވެ. މި ބައްދަލުވުމުގައި ފެނަކަ އާއި އެމްޑަބްލިއުއެސްސީގެ ބޭފުޅުން ވެސް ބައިވެރިވެ ވަޑައިގެންނެވިއެވެ.
އެގޮތުން މިނިސްޓްރީ އިން ވިދާޅުވީ ލެބް ހެދުމަށް ބޭނުންވާ ހުރިހާ އާލަތްތަށް މިހާރު ފެނަކައާ ހަވާލުކުރެވިފައިވާ ކަމަށެވެ. އަދި މި ލެބް ވަރަށް އަވަހަށް ހިތަދޫ ގައި ޤާއިމް ކުރެވިގެން ދާނެކަމަށް ފެނަކައިން ވަނީ މިއަދުގެ ބައްދަލުވުމުގައި ބުނެފައެވެ.
މީގެ އިތުރަށް މިބައްދަލުވުމުގައި ފޭދޫ ފެން ހިންދުމުގެ ނިޒާމް ރަނގަޅު ކުރުމާ ބެހޭގޮތުން ވެސް ވަނީ މަޝްވަރާކޮށްފައެވެ. އަދި ހިތަދޫ ،މަރަދޫ ، މަރަދޫ ފޭދޫގެ ފެން ހިންދުމުގެ ނިޒާމް ޑިޒައިންކޮށް އީއޭއައިގެ މަސައްކަތްތައް އިއުލާން ކުރެވިގެންދާނެ ކަމަށްވެސް ކައުންސިލުން ވަނީ ބުނެފައެވެ.
މިއަދުގެ ބައްދަލުވުމުގައި މިނިސްޓްރީން ވަނީ އައްޑޫގެ ގުޅިފައިވާ ރަށްތަކުގެ ނަރުދަމާގެ މަސައްކަތް މުޅިން ނިންމައި ސެޕްޓެމްބަރު މަހު ހިދުމަތް ދެވޭނެ ކަމަށްވެސް ބުނެފައެވެ.
އައްޑޫގެ ނަރުދަމާގެ މަސައްކަތަކީ ރައީސް ނަޝީދުގެ ސަރުކާރުގައި 2009 ވަނަ އަހަރު ފެށި މަސައްކަތަކެވެ. ނަމަވެސް އެވެރިކަން ނިމުނު ފަހުން ހަތް އަހަރުވެގެންދާއިރު ވެސް އައްޑޫގެ ނަރުދަމާ ވިއުގައިގެ މަސައްކަތް ނިމި ރައްޔިތުންނަށް ހިދްމަތް ދެވޭވަރު ނުވެއެވެ.