ހޯމް މިނިސްޓަރ ޝެއިޚް އިމްރާން އަބްދުﷲ އަށް ބޮޑެތި ފާޑުކިޔުންތަކެއް އަމާޒުވެ، އެމަނިކުފާނުގެ އިތުބާރު ނެތްކަމުގެ ވޯޓަށް ނެގުމަށް ގޮވާލަމުންދާ މިދަނޑިވަޅުގައި މިނިސްޓަރު އިމްރާންގެ ދިފާއުގައި ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވާހަކަފުޅު ދައްކަވައިފިއެވެ.
ނޮވެމްބަރު 3 ގެ އުދުވާނީ ހަމަލާގެ މޭސްތިރިޔާ އަބްދުﷲ ލުތުފީ މިރޭ ފުލުހުންގެ ބެލުމުގެ ދަށުގައި ރާއްޖެ ގެނެސްފައިވާއިރު ރައީސް ނަޝީދު ވިދާޅުވީ ކުރީގެ އެއްވެސް ކޮމިޝަނަރެއްގެ ދައުރުގައި ލުތުފީ ރާއްޖެ ނުގެނެވުނު ކަމަށާއި، ލުތުފީ ގެނެވުނީ ރައީސް ސޯލިހުގެ ވެރިކަމުގައި، އިމްރާންގެ ހޯމް މިނިސްޓަރު ކަމުގައި އަދި ސީޕީ ހަމީދުގެ ކޮމިޝަނަރު ކަމުގައި ކަމަށެވެ.
Majlis thalhumuga Home Minister ithurufulhu hadhavaane kamah dhekigen nuvaane.Ethah police commissionerakai home ministerunge dhauru nimi dhiya iruves Luthfee Raajje genevifaeh nuvey.Ekanvee RJ @ibusolih ge raees kamuga,@ShimranAb ge home minister kamuga, @M_Hameedh ge CP kamuga
— Mohamed Nasheed (@MohamedNasheed) July 9, 2019
ކުރީގެ ހޯމް މިނިސްޓަރު އުމަރު ނަސީރު މަގާމުގައި ހުންނެވިއިރު ލުތުފީ ރާއްޖެ ގެނައުމަކީ މުހިންމު ކަމެއް ނޫން ކަމަށް އުމަރު ވިދާޅުވި ކަމަށް މިނިސްޓަރު އިމްރާން ވަނީ މަޖިލީހުގައި ވިދާޅުވެފައެވެ. ނަމަވެސް ކުރީގެ ކޮމިޝަނަރުގެ މަގާމު އަދާކުރެއްވި ތިން ކޮމިޝަނަރެއް ވަނީ މިނިސްޓަރުގެ ވާހަކަފުޅު ދޮގުކޮށްފައެވެ.
އެގޮތުން ރައީސް ޔާމީންގެ ވެރިކަމުގައި ސީޕީގެ މަގާމު ފުރުއްވި އަރީފާއި ހުސެން ވަހީދު ވަނީ އިމްރާން ހެއްދެވީ ކަނޑައެޅިގެން އިތުރުފުޅެއް ކަމަށް ވިދާޅުވެފައެވެ. އޭގެ ކުރިން މަގާމް ފުރުއްވި މެމްބަރު ރިޔާޒު ވެސް ވަނީ ގެއްލިފައިވާ މީހަކު ހޯދަން މިނިސްޓަރު އަންގަން ނުޖެހޭ ކަމަށާއި އެމީހަކު ހޯދުމަކީ ފުލުހުންގެ މައްޗަށް ގާނޫނީ ގޮތުން ވާޖިބު ކަމެއް ކަމަށް ވިދާޅުވެފައެވެ.
އިދިކޮޅު މެމްބަރުން ވަނީ އޭގެ ސަބަބުން މިއަދު، އިމްރާން މަޖިލީސް ތަޅުމުގައި އިތުރުފުޅު ހައްދަވާފައިވާ ކަމަށް ވިދާޅުވެ އިތުބާރު ނެތްކަމުގެ ވޯޓު ނަގަން ގޮވާލާފައެވެ. އޭގެ ތެރޭގައި ފަރެސްމާތޮޑާ ދާއިރާގެ މެމްބަރު ހުސެއިން މުހައްމަދު ލަތީފް ހިމެނެއެވެ.
މޭ އެއްވަނަ ދުވަހުން ފެށިގެން ސްރީ ލަންކާގައި ހުންނަ ދިވެހި އެމްބަސީ އަށް އަމިއްލައަށް ލުތުފީ ވަނީ ގޮސްފައެވެ. ލުތުފީ ރާއްޖެ ނުގެނެވި މިހާ ލަސްވެގެން ގޮސްފައިވަނީ ލަންކާގައި ހިނގާދިޔަ ހަމަނުޖެހުންތަކުގެ ސަބަބުން ކުއްލި ހާލަތަށް ގޮސްފައިވާތީއާއި އެގައުމުން ހޯދަން ޖެހޭ ލިޔެކިޔުންތަކެއް ނުލިބުމުގެ ސަބަބުން ކަމަށް ރައީސް އިބްރާހިމް މުހައްމަދު ސޯލިހް ވަނީ ވިދާޅުވެފައެވެ.
ލުތުފީ މިރޭ ދިވެހި ފުލުހުންގެ ހަވާލުގައި ރާއްޖެ ގެނެސްފައިވާއިރު މިރޭ ފުލުހުން ވަނީ ކަރެކްޝަންސްއާއި އޭނާ ހަވާލުކޮށްފައެވެ. ބޭރުގެ ހަނގުރާމަވެރި ޖަމާއަތެއް ގޮވައިގެން ރާއްޖެއަށް އައިސް ދިން އުދުވާނީ ހަމަލާގެ ސަބަބުން ލުތުފީއަށް ވަނީ އުމުރު ދުވަހުގެ ޖަލު ހުކުމެއް އިއްވާފައެވެ. އެހުކުމުގައި ބާކީ އޮތީ ހަތަރު އަހަރާއި މަސްތަކެއް ކަމަށް ހޯމް މިނިސްޓަރ ޝެއިޚް އިމްރާން ވަނީ ވިދާޅުވެފައެވެ.