ޤައުމަށް ބޭނުންވަނީ އުފެއްދުންތެރި އާ ޒުވާން ޖީލެއް ކަމަށް ރައިސުލްޖުމުހޫރިއްޔާ އިބްރާހިމް މުހައްމަދު ޞޯލިޙް ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ 2018 ވަނަ އަހަރު މަތީ ޘާނަވީ ތަޢުލީމު ނިންމާ އިމްތިހާނުތަކުން އެންމެ ރަނގަޅު 10 ނަތީޖާ ހޯދި ދަރިވަރުންނަށް އިނާމާއި ހަނދާނީ ލިޔުން ދިނުމަށް ރޭ ދަރުބާރުގޭގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ.
މިޖަލްސާގައި ވަހާކަފުޅު ދައްކަވަމުން ރައީސް ވިދާޅުވީ ތައުލީމު އުނގެނުމުގައި، ރާއްޖެއަށް ބޭނުންޖެހިފައިވާ ދާއިރާތަކުން އައު އީޖާދުތަކާއި އައު އުފެއްދުންތައް ހޯދުމަކީ މުހިންމުކަމެއް ކަމަށެވެ. އަދި ދަރިވަރުން މަތީ ތަޢުލީމުގެ މަރުޙަލާގައި، ޢިލްމީ ބަހުސްތައް ކުރެވެމުންދާއިރު، ރާއްޖޭގެ ޖަޒީރާވަންތަ ރީތި ސިފަތަކާއި އެއާ ގުޅިގެން ލިބިފައިވާ، ގިނަގުނަ ޤުދްރަތީ ވަސީލަތްތަކާމެދު ވިސްނުން ގެންގުޅުމަކީ މުހިއްމު ކަމެއްކަމަށްވެސް ރައީސް ފާހަގަކުރެއްވިއެވެ.
"އަޅުގަނޑުމެންގެ ތެރޭގައި ވަރަށް މަތީ ފެންވަރަށް ޢިލްމު އުނގެނިވަޑައިގެން ތިއްބެވި، ވަރަށް ތާޒާ ވިސްނުންތައް ގެންގުޅުއްވާ ބޭފުޅުން އެބަ ތިއްބެވި. ނަމަވެސް، މި ޤައުމަށް އެންމެ ބޮޑަށް ބޭނުންވާ، އައު އީޖާދުތަކާއި، އައު އުފެއްދުންތައް ލިބިގެން މެނުވީ، ތަޢުލީމަށް މި ކުރާ ހޭދައިގެ ފޮނިމީރުކަން، އަޅުގަނޑުމެން ބޭނުންވާ މިންވަރަށް ޙާޞިލެއް ނުކުރެވޭނެ" ރައީސް ވިދާޅުވިއެވެ.
މީގެ އިތުރުން ރާއްޖޭގައި ތިބެގެން ތަޢުލީމު ޙާޞިލްކުރުމަށް ސަރުކާރުން ފަހިކޮށްދެއްވި ފުރުޞަތުތަކުގެ މައްޗަށްވެސް އަލިއަޅުއްވައިލައްވާ ރައީސް ވިދާޅުވީ ހިލޭ ފުރަތަމަ ޑިގްރީއަށް ކިޔެވުމުގެ ފުރުޞަތާއި، އިންޓްރެސްޓް ކުޑަކޮށް އަދި ލޯނު ދައްކަންޖެހޭ މުއްދަތު އިތުރުކޮށްދީފައިވާ ކަމަށެވެ.އަދި ސްޓޫޑެންޓް ލޯނަށް ސަރުކާރުން ގެންނެވި ބަދަލުތައް ރައީސްގެ ވާހަކަފުޅުގައި ފާހަގަކުރެއްވިއެވެ.
ރައީސުލްޖުމްހޫރިއްޔާ ވަނީ ސަރުކާރުން ފަހިކޮށްދެއްވާފައިވާ މި ފުރުޞަތުތަކުގެ ބޭނުން ހެޔޮގޮތުގައި ހިފައި ޤައުމު އާރާސްތުކުރުމުގެ ޢަމަލީ މަސައްކަތުގައި ބައިވެރިވުމަށް އަޒުމު ކަނޑައެޅުމަށް ދަރިވަރުންގެ ކިބައިން އެދިވަޑައިގެންފައެވެ.
މިދިޔަ އަހަރު މަތީ ޘާނަވީ ތައުލީމު ނިންމާ އިމްތިހާނުތަކުން ފުރިހަމަ 1 ވަނަ ހޯދި 4 ދަރިވަރުންނަށް ޓްރޮފީއާ ހަނދާނީ ލިއުން ހަވާލުކޮށްދެއްވީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙެވެ. އަދި ވަކިވަކި މާއްދާތަކުން ދުނިޔޭގެ ފެންވަރުގައި އެންމެ ރަނގަޅު ނަތީޖާ ހޯދި 11 ދަރިވަރުންނަށް ޓްރޮފީއާ ހަނދާނީ ލިއުން ހަވާލުކޮށްދެއްވީ ރައީސުލްޖުމްހޫރިއްޔާގެ ނައިބު ފައިޞަލް ނަސީމެވެ.
މިދިޔަ އަހަރު މަތީ ޘާނަވީ ތައުލީމު ނިންމާ އިމްތިހާނުތަކުން އެންމެ ރަނގަޅު ނަތީޖާ ހޯދައިގެން 195 ކުއްޖަކު ރާއްޖޭގެ ގަދަ 10ގެ ތެރޭގައި ހިމެނިފައިވެއެވެ. މި ކުދިންގެ ތެރެއިން، ދުނިޔޭގެ އެންމެ މޮޅު 10 ވަނައިގައި ، 34 ދަރިވަރަކު ހިމެނިފައިވެއެވެ.