ނުވަ އަހަރު ދުވަހު ފިލައިގެން އުޅުމަށް ފަހު ރޭ ރާއްޖެ ގެނައި، ހ. ހާޖަރާގެ އަބްދުﷲ ލުތުފީގެ ސިފައާ މެދު ބައެއް މީހުން ސުވާލު އުފައްދައި އެއީ އޭނާތޯ ޔަގީން ކުރުމަށް ގޮވާލަމުންދާ ދަނޑިވަޅެއްގައި ޕްރޮފެސަރ ހަސަން އުގެއިލް، ގެނެވުނީ ލުތުފީކަން ހިސާބު އިލްމު ބޭނުންކޮށްގެން ސާބިތުކޮށްދީފިއެވެ.
ޔުނިވާސިޓީ އޮފް ބްރެޑްފޯޑްގައި މަސައްކަތް ކުރައްވަމުން އަންނަ ޕްރޮފެސަރ އުގެއިލް ވަނީ އޭނާގެ މީހުން ދަނެގަތުމުގެ ސޮފްޓްވެއާ ބޭނުންކޮށްގެން ލުތުފީގެ މޫނު ދަނެގަނެފައެވެ. ރޭ ރާއްޖެ ގެނައުމުން ލުތުފީގެ ފޮޓޯތައް އާންމުވެފައިވާއިރު ފިލުމުގެ ކުރިން ނަގާފައިވާ ފޮޓޯއާއި ރޭގެ ފޮޓޯއިން ފެންނަ މީހާއަކީ ހަމަ އެކަކު ކަން ސާބިތުވެފައިވާ ކަމަށް އުގެއިލް ވިދާޅުވިއެވެ.
Indeed all these photos are from the same individual. pic.twitter.com/dUDZ3yOWFe
— Professor Ugail (@ugail) July 10, 2019
ޕްރޮފެސަރ އުގެއިލްއަކީ މިއިލްމުގައި ދުނިޔޭގެ ފެންވަރުގެ ތަޖުރިބާ ހާސިލް ކުރައްވައިގެން ހުންނެވި ބޭފުޅެކެވެ. ތުރުކީގައި ހުރި ސައުދީ ކޮންސިއުލޭޓުގައި މަރާލި ވޮޝިންޓަން ޕޯސްޓުގެ ނޫސްވެރިޔާ، ޖަމާލް ޚާޝުގްޖީގެ މަރާލި ކަމަށް ތުހުމަތު ކުރެވޭ މީހުން ހޯދުމުގައި ވެސް އުގެއިލްގެ އެހީ ވަނީ ހޯދާފައެވެ.
ހިސާބު އިލްމާއި ކޮމްޕިއުޓަރ ސައިންސުން މަތީ ތައުލީމް ހާސިލް ކުރައްވާފައިވާ އުގެއިލްއަކީ ވަނީ ފޮޓޯތަކުން މީހުން ދަނެގަތުމާއި މޫނު މައްޗަށް އަންނަ ކުލަވަރުތަކުން މީހާ ހަދަނީ ދޮގެއްތޯ ނުވަތަ ތެދެއްތޯ ދަނެގަނެވޭނެ ފަދަ ސޮފްޓްވެއާ ފުރިހަމަކޮށްފައެވެ.