އެއްގަމު ދަތުރުފަތުގެ ޤާނޫނުގައި އެއްގަމު އުޅަނދު ދުއްވާއިރު ދުންފަތުގެ އިސްތިޢުމާލު ކުރުމާއި މޮބައިލް ފޯނު ބޭނުން ކުރުން މަނާކަމެއް ގޮތުގައި އޮތް ނަމަވެސް އެއްގަމު އުޅަނދުފަހަރު ދުއްވާ އިރު ދުންފަތުގެ އިސްތިޢުމާލު ކުރުމާއި މޮބައިލް ފޯނު ބޭނުން ކުރުން ފަދަ ކަންކަން އިތުރުވަމުންދާ ކަމަށް ފުލުހުން ބުނެފި އެވެ.
އެއްގަމު ދަތުރުފަތުރުކުރާ އުޅަނދު ދުއްވަންއިންނަމީހާ މޮބައިލް ފޯނު ބޭނުންކުރުމާއި މުވާޞަލާތީ ވަޞީލަތްތައް ބޭނުން ކުރުން މަނާކޮށްފައި ވަނީ އެއިން ދުއްވާ މީހާ އަށާއި އެހެން މީހަކަށް ލިބިދާނެ ގެއްލުމަކުން ސަލާމަތް ކުރުމަށެވެ.
ފުލުހުންގެ ތަފާސް ހިސާބުތަކަށް ބަލާ އިރު އެއްގަމު އުޅަނދު ފަހަރުގައި ދުންފަތުގެ އިސްތިޢުމާލު ކުރުމުގެ މައްސަލަތައް އިތުރުވަމުން ދާކަން ވަނީ ފާހަގަ ކުރެވިފަ އެވެ.
އެގޮތުން ހަމައެކަނި ފާއިތުވި ހަފްތާގައި ވެސް ދުންފަތުގެ އިސްތިޢުމާލު ކުރުމާ ގުޅޭ މައްސަލަތަކުގައި ހަ ފަރާތެއް ޖޫރި މަނާ ކުރެވިފައިވެ އެވެ.
އެއްގަމު ދަތުރުފަތުރުގައި ދުންފަތުގެ އިސްތިޢުމާލު ކުރާ ފަރާތްތައް ހިފަހައްޓައި ޤާނޫނުގައިވާ ގޮތުގެ މަތިން އަޅަން ޖެހޭ ފިޔަވަޅުތައް ފުލުހުން އަޅަމުންދާނެ އެވެ.
ހަމަ އެއާއެކު މުވާޞަލާތީ ވަޞީލަތްތައް ބޭނުން ކުރާ ފަރާތްތަކުން ކުރާ ކުށްތައް ހުއްޓުވުމަށް ވެސް ފުލުހުން ފިޔަވަޅު އަޅަމުން ގެންދާނެ އެވެ.
ނަމަވެސް ޢާއްމު ރައްޔިތުން މިކަމަށް މިހާރަށްވުރެ ބޮޑަށް ހޭލުންތެރިވެ، މިފަދަ ކަންކަމުން މުޖުތަމަޢު ސަލާމަތްކުރަން މަސައްކަތް ކުރުމަކީ ކޮންމެ ފަރުދެއްގެ ވެސް ޒިންމާއަކަށް ހަދައިފި ނަމަ މުޖުތަމަޢަށް ވަރަށް ބޮޑު ޚިދުމަތެއް ކޮށްދެވިގެން ދާނެ ކަމަށް ފުލުހުން ބުނެ އެވެ.
އަދި އެއީ ރައްޔިތުންގެ އަތުން ސަލާމަތް ކުރެވޭ ގިނަ ޢަދަދެއްގެ ފައިސާ އަށް ވެ، ދިރިއުޅުމަށް ފައިދާ ހުރި ކަންކަމަށް އެ ފައިސާ ޚަރަދު ކުރުމުގެ ފުރުޞަތު ލިބިގެން ދާނެ ކަމެއް ކަމަށް ވެސް ފުލުހުން ބުނެ އެވެ.
އެހެން ކަމުން މަގު މައްޗަށް ދެވޭ ސަމާލުކަން މިހާރަ ށްވުރެ ބޮޑަށް އިތުރުކޮށް ނުރައްކާތެރި ޙާދިސާތައް ހިނގުމުގެ ފުރުޞަތު ކުޑަކުރުމަކީ ކޮންމެ ރައްޔިތެއްގެ ވެސް ފަރުދީ ޒިންމާއެއް ކަމުގައި ހެދުމަކީ މުހިއްމު ކަމެއް ކަމަށް ފުލުހުން ބުންޏެވެ.
.