މި އަހަރުގެ ޖޫން މަހުގެ ތެރޭގައި ހުޅުވާލެވުނު ސްޓޫޑެންޓް ލޯނަށް ހޮވުނު ދަރިވަރުންގެ ލިސްޓު މިނިސްޓްރީ އޮފް ހަޔަރ އެޑިއުކޭޝަނުން ބުނިގޮތަށް މިދިޔަ ހަފްތާތެރޭގައި އިއުލާނުނު ނުކުރެވުނެވެ.
މާރޗު މަހުގައި އިއުލާނު ކުރި ލޯނުގެ ނަތީޖާ އިއުލާނުކޮށް، އޭގައި ގިނަ މައްސަލަތަކެއް ހުރެ، ދަރިވަރުންނާއި ޢާންމުންގެ ބޮޑެތި ފާޑުކިޔުންތައް މިނިސްޓްރީއަށް އާންމުވުމާއެކު މިނިސްޓްރީއިން އެބުރުގައި ބާކީވި ލޯނު ތަކަށް ހުޅުވާލި މިބުރުގެ ނަތީޖާ ބުރާސްފަތި ދުވަހު އާންމު ނުކުރުމުން މިނިސްޓްރީއަށް އައްޑޫލައިވް އިން ވަނީ ގުޅާ މައުލޫމާތު ސާފުކޮށްފައެވެ. މިކަމާގުޅިގެން މިނިސްޓްރީއިން ދިން ޖަވާބަކީ އެދުވަހުވެސް ނަތީޖާ އާންމުކުރަން މަސައްކަތް ކުރަމުން ދާކަމާއި، ހަފްތާ ބަންދު ދުވަސްތެރޭގައިވެސް ނަތީޖާ އާންމު ކުރެވިދާނެކަމަށެވެ. އެހެންނަމަވެސް ހަފްތާ ބަންދު ނިމިގެން ދިޔައިރުވެސް މިނިސްޓްރީއަށް ވަނީ މިނަތީޖާ އިއުލާނު ނުކުރެވިފައެވެ.
މިދިޔަ ހަފްތާ ތެރޭގައި ނަތީޖާ އިއުލާނު ނުކުރެވުނު ސަބަބު ސާފުކުރަން މިނިސްޓްރީއަށް މިއަދު ގުޅާލުމުން ލިބުނު ޖަވާބަކީ މިއަދު މެންދުރުގެ ވަގުތެއްގައި ނަތީޖާ އާންމުކުރެވޭނެކަމަށެވެ. 900 އަށް ވުރެ ގިނަ ދަރިވަރުން ލޯނަށް އެދި ހުށައެޅި މިބުރުގެ ނަތީޖާ އަކީ ގިނަ ދަރިވަރުން އެކަމުގެ އިންތިޒާތުގައި ތިބި ކަމެކެވެ.