ފްލައިމީ އައްޑޫ ފުޓްސަލް ޗެލްންޖްގެ ގްރޫޕް ސީގައި ރޭ އެފްސީ ކަންމަތި އަދި އަބާނީ ބައްދަލުކުރި މެޗް 2-2 ލަނޑުން އެއްވެރުވެ ދެވަނަ މެޗް 4-2 ލަނޑުން މެޖެންޓާ ކާމިޔާބް ކޮށްފިއެވެ.
ރޭގެ ފުރަތަމަ މެޗްގައި އެފްސީ ކަންމަތި އަދި އަބާނީ ކުޅުނު އަވަސް ފޯރިގަދަ މެޗްގައި އަބާނީގެ ދެ ލަނޑު ވެސް ޖަހައި ދިނީ މެޗްގެ މޮޅު ކުޅުންތެރިއާ ހޯދި ޖޯޒީ ނަންބަރު 10 އަބްދުﷲ އަފްޝީންއެވެ. އެފްސީ ކަންމަތީގެ ދެ ލަނޑު އެޓީމަށް ޖަހައިދިނީ ޖޯޒީ ނަންބަރު 7 އަބްދުﷲ އައްޒާމްއެވެ.
މި މެޗްގައި އެފްސީ ކަންމަތީގެ ހުސެއިން ނާޒިމް އަށް ވަނީ ރީދޫ ކާޑް ދައްކާފައެވެ.
ގްރޫޕް ސީ ގެ ދެވަނަ މެޗްގައި ހިތަދޫ އެމްސީ ޔުނައިޓެޑް އާއި ފޭދޫ މެޖެންޓާ ކުޅުނު ފޯރި ގަދަ މެޗް ފެށުނުތަނާ ހެން އެމްސީ ޔުނައިޓެޑްގެ ކީޕަރު އިބްރާހިމް ސައީދުއަށް ވަނީ ރަތް ކާޑް ދައްކާ ދަނޑުން ފޮނުވާލާފައެވެ. މެޗްގެ ފެށިގެން ކުޑަ އިރު ކޮޅެއްގެ ތެރޭގައި މެޖެންޓާގެ ޖޯޒީ ނަންބަރު 12 ޠޯހާ މުހައްމަދު (ޓޮޓީ) ހުރިހާ ކުޅުންތެރިން ގައިން ނައްޓައި އެރިއާ ތެރެއަށް ވަންނަން ދަނިކޮށް ކީޕަރު ސައިދު ވަނީ އޭރިއާ ބޭރުން ޠޯހާއަށް ޓެކްލްކޮށް ވައްޓާލާފައެވެ. އެ ހަމަލާ އާއި ގުޅިގެން ރެފްރީ ވަނީ ސައީދަށް ރަތްކާޑް ދައްކާފައެވެ.
އެމްސީ ޔުނައިޓެޑްއިން މެޗްގެ ބާކީ ބައި ފުރިހަމަ ކުރީ ބެންޗުގައި އިން ހަސަން އަސްއަދު ކީޕަރަކަށް އަރުވައިގެން ނެވެ. އައްސަދު ވަނީ ކީޕރަށް އަރައި މޮޅު ކުޅުމެއް ދައްކާފައެވެ. އެއް ކުޅުންތެރިއަކު މަދުކޮށް ކުޅެ މެޖެންޓާއިން ވަނީ ދެ ލަނޑު ޖަހައި މެޗްގެ ނަތީޖާ 2-0 ބަދަލުކޮށްފައެވެ. ނަމަވެސް އެމްސީ ޔުނައިޓެޑްގެ އާސިފް މުހައްމަދު (ސިއްޕޭ) ވަނީ 2 ލަނޑު ޖަހައި މެޗް އެއްވަރު ކޮށްދީ އެމްސީ ޔުނައިޓެޑަށް އުއްމީދު އާ ކޮށްދީފައެވެ. ނަމަވެސް މެޗް ނިމެމުން ދަނިކޮށް މެޖެންޓާއިން ވަނީ އިތުރު ދެ ލަނޑު ޖަހައި މެޗްގެ ނަތީޖާގެ ފަރަގު ބޮޑު ކޮށްފައެވެ.
މެޖެންޓާއަށް ލަނޑު ޖައިދިނީ އެޓީމުގެ ޖޯޒީ ނަންބަރު 8 މޫސާ ނަޝީދު (ނަޓާ) އާއި ޠޯހާ މުހައްމަދު (ޓޮޓީ) އަދި މުހައްމަދު ތިލްމީޒު (ބިއްޑޭ)އެވެ. ބިއްޑޭ ވަނީ ދެ ލަނޑު ޖަހައި މެޗްގެ މޮޅުންތެރިއާ ހޯދާފައެވެ.
ރޭ ގްރޫޕް ސީގެ މެޗްތައް ކުޅެ ނިމުމުން ގްރޫޕްގެ އެއްވަނާގައި މިވަގުތު 3 ޕޮއިންޓާއި އެކު އޮތީ މެޖެންޓާއެވެ. އެފްސީ ކަންމަތި އަދި އަބާނީ ކޮންމެ ޓީމަކަށް ޕޮއިންޓެއް ލިބިފައިވާ އިރު ތާވަލްގެ ފުލުގައި މިމަގުތު އޮތީ އެމްސީ ޔުނައިޓެޑް އެވެ.