މުޖުތަމަޢުގެ ހަވާސާގައި އުޅޭ ޒުވާޏުންނަށް އަމާޒްކޮށްގެން ޑައިވިން ކޯސްތަކެއް ހިންގުމަށް އެހީތެރިކަން ފޯރުކޮށް ދިނުމަށް މޯލްޑިވްސް ޕޮލިސް ސަވިސް އާއި އޭޝިޔާ ފައުންޑޭޝަން (އޭއެފް) އާ އެކު މެމޮރަންޑަމް އޮފް އަންޑަސްޓޭޑިން (އެމްއޯޔޫ) އެއްގައި ސޮއިކޮށްފި އެވެ.
މޯލްޑިވްސް ޕޮލިސް ސަވިސްގެ ފަރާތުން މި އެމްއޯޔޫގައި ސޮއި ކުރެއްވީ ކޮމިޝަނަރު އޮފް ޕޮލިސް ޢަބްދުﷲ ރިޔާޒް އެވެ. އޭޝިޔާ ފައުންޑޭޝަންގެ ފަރާތުން ސޮއި ކުރެއްވީ އޭޝިޔާ ފައުންޑޭޝަންގެ ކަންޓްރީ ރެޕްރެޒެންޓޭޓިވް ދިނޭޝާ ޑިސިލްވާ ވިކްރަމަނަޔަކަ އެވެ.
މި އެއްބަސްވުމުގެ ދަށުން މުޖުތަމަޢުގައި އުޅޭ ޒުވާނުން ކުށުގެ މާހައުލުން ދުރުކޮށް އެފަދަ ޒުވާނުންނަށް މުސްތަޤުބަލުގައި ފައިދާ ކުރުވަނިވި މަސައްކަތެއް ދަސްކޮށް ދިނުމުގެ އިތުރުން ވަޒީފާގެ ފުރުސަތު ހޯދައި ދީ ބާރުވެރިކުރުމަށްޓަކައި ދެ ފަރާތް ގުޅިގެން މަސައްކަތް ކުރުމަށް ވަނީ ހަމަޖެހިފަ އެވެ.
އަދި މޯލްޑިވްސް އިންސްޓިޓިއުޓް އޮފް ފިޒިކޯލޮޖިކަލް ސަވިސަސް ޓްރެއިނިން އެންޑް ރިސާޗް އާއި މޯލްޑިވްސް ޕޮލިސް ސަވިސް ގުޅިގެން ހިންގާ ކޯސްތަކަށް ބޭނުންވާ ވަސީލަތްތަކާއި ފަންނީ އެހީތެރިކަން ފޯރުކޮށް ދެވޭނެ އެވެ.