2020ގެ އޮލިމްޕިކް އަދި ޕެރެލިމްޕިކް ގޭމްސް ފެށެން އަދި އަހަރެއްހާ ދުވަސް އެބައޮތެވެ. އެހެންނަމަވެސް ޖަޕާނުން މެޑަލްތައް ހެދުމުގައި އެއްވެސް ލަހެއްނުކުރެއެވެ.
ޓޯކްޔޯ 2020ގެ މެޑަލް ޕްރޮޖެކްޓުން މައުލޫމާތުދޭ ގޮތުގައި ރަން، ރިހި އަދި ލޯ މެޑަލްތައް ތައްޔާރުކޮށްފައިވަނީ މުޅިންވެސް ރިސައިކަލް ކުރެވިފައިވާ އިލެކްޓްރޯނިކްސް ބޭނުންކޮށްގެންނެވެ.
އެގޮތުން މި މެޑަލްތައް ހެދުމަށް ޖުމްލަ 78،985 ޓަންގެ އިލެކްޓްރޯނިކް އާލާތްތައް ރިސައިކަލްކޮށްފައިވާއިރު، އޭގެތެރޭގައި 6.21 މިލިއަން މޮބައިލް ފޯނު ހިމެނެއެވެ. އެ ޕްރިޖެކްޓުން އިތުރަށް މައުލޫމާތު ދީފައިވާގޮތުގައި އެއްކުރެވުނު 80،000 ހާ ޓަނުގެ އިލެކްޓްރޯނިކް އާލާތްތަކުން ނެގިފައިވަނީ 32 ކިލޯގްރާމް ރަން، 3،500 ކިލޯގްރާމް ރިހި، އަދި 2،200 ކިލޯގްރާމް ލޯ (ލޯ އަސި ޒިންކް)އެވެ.
ބުނެވޭ ގޮތުގައި މެޑަލްތައް ހެދުމަށް މުޅިންވެސް ބޭނުންކޮށްފައިވަނީ މި އިލެކްޓްރޯނިކްސްގެ ބައިތަކެވެ. އެހެންނަމަވެސް މެޑަލްތަކުގެ ރިބަންތައް ހަދާފައިވަނީ އިލެކްޓްރޯނިކްސް ބޭނުންކޮށްގެން ކަމެއް ޓޯކްޔޯ 2020 އިން ސާފުކޮށްދީފައިނުވެއެވެ.
ތޯކްޔޯ 2020 މެޑަލް ޕްރޮޖެކްޓާއި ޖަޕާނުގެ މޮބައިލް ކެރިއަރ އެންއެންޓީ ޑޮކޮމޯ އިން މި މެޑަލްތައް ހެދުމަށް ބޭނުންކުރި އިލެކްޓްރޯނިކްސް އެއްކޮށްފައިވަނީ އެޕްރިލް 2017 އާއި މާރޗް 2019 އާއި ދެމެދުއެވެ. މި ދެއަހަރު ތެރޭގައި މި ޕްރޮޖެކްޓުންވަނީ ގާތްގަނޑަކަށް 5،000 އޮލިމްޕިކް އަދި ޕެރެލިމްޕިކް މެޑަލް ހެދޭހާ ދަގަނޑުގެ ބާވަތްތައް އެއްކޮށްފައެވެ.