އިންޑިއަން އޯޝަން އައިލެންޑު ގޭމްސް (އައިއޯއައިޖީ)ގެ ނިންމުމުގެ ރަސްމިއްޔާތުގައި ރާއްޖޭގެ ދިދަ އުފުލަށް ޓީޓީ ޗެމްޕިއަން ފާޠިމަތު ދީމާ އަލީއަށް ދީފިއެވެ.
ދީމާއަށް ރާއްޖޭގެ ދިދަ އުފުލުމަށް ހަވާލުކޮށްދެއްވީ ރޭ މޮރިޝަސްގައި ކުރިއަށް ދިޔަ މެޑަލް ޕާޓީގައި ސްޕޯޓްސް މިނިސްޓަރ އަހުމަދު މަހްލޫފުއެވެ.
އުމުރުން 11 އަހަރުގެ ދީމާ ވަނީ ޓީޓީއިން ސިންގަލްސް އަދި ޑަބަލްސް އަދި ޓީމް އިވެންޓުން ރަން މެޑަލް ހޯދާފައެވެ. މި ކާމިޔާބީ އާއި އެކު ދީމާ ހިމެނެނީ ބައިނަލްއަގްވާމީ މުބާރާތަކުން އެންމެ ބޮޑު ކާމިޔާބީއެއް ހޯދި ދިވެހި ކުޅުންތެރިޔާއަށެވެ.
މިފަހަރުގެ އިންޑިއަން އޯޝަން ގޭމްސްއަށް ރާއްޖެއިން ކަނޑައެޅި ލަނޑުދަނޑި ހާސިލް ވެފައިވާ އިރު 2023 ވަނަ އަހަރުގެ އިންޑިއަން އޯޝަން ގޭމްސް ބޭއްވުމަށް ރާއްޖެއަށް މިހާރު ވަނީ ލިބިފައެވެ.