މިދިޔަ އަހަރުގެ ސެޕްޓެމްބަރު މަހު ބޭއްވި ރިޔާސީ އިންތިޚާބުގެ ނަތީޖާ އަދިވެސް ގަބޫލުފުޅު ކުރައްވަން ދަތި ކަމަށް ކުރީގެ ރައީސް އަދި އިންތިޚާބުން ނާކާމިޔާބުވެވަޑައިގެންނެވި އަބްދުﷲ ޔާމީން ވިދާޅުވެއްޖެއެވެ. ވެރިކަން ބަދަލުވެ ޔާމީންގެ މަނީ ލޯންޑަރިންގެ މައްސަލައެއް ވެސް ކޯޓުގައި ކުރިއަށްދާއިރު އޮންލައިން ނޫސް "ދަ ޕްރެސް" އަށް ޔާމީން ވަނީ އިންތިޚާބާ މެދު ސުވާލު އުފެއްދޭ ސަބަބުތައް ކިޔާ ދެއްވާފައެވެ.
ޔާމީން ވަނީ އިލެކްޝަންސް ކޮމިޝަނުން ކޮމްޕެލެއިންސް ބިއުރޯ ޖަމާލުއްދީން ސްކޫލުން ދަރުބާރުގެއަށް ކުއްލިއަކަށް ބަދަލުކުރެއްވި ކަން ފާހަގަކުރައްވާފައެވެ. ދަރުބާރުގެއަށް ބަދަލުކުރުމަށް ފަހު އެތަނުގައި ފެކްސް މެޝިނެއް އަދި އީމެއިލް މެދުވެރިކޮށް ވެސް ޝަކުވާ ހުށައެޅޭނެ އިންތިޒާމެއް ގާއިމްވެފައި ނުވާ ކަމަށް ވިދާޅުވިއެވެ. އޭގެ ސަބަބުން ވޯޓުލީ ދުވަހު ޝަކުވާ ހުށައަޅަން ތިއްބެވި އެތައް ބަޔަކަށް ޝަކުވާ ހުށައެޅިފައިނުވާ ކަމަށް ވިދާޅުވެ އިންޓަވިއުގައި ޝަކުވާ ކުރެއްވިއެވެ.
ދެން ފާހަގަކުރެއްވި ކަމަކީ ވޯޓު ކަރުދާސް ޗާޕް ކުރުމުގައި ޝައްކުކުރެވޭ ކަންތައްތަކެއް ހުރުމެވެ. ރައީސް ޔާމީން ވިދާޅުވީ ވޯޓު ކަރުދާސް ޗާޕްކުރަން އަބަދުވެސް ނޮވެލްޓީ ބުކްޝޮޕާ ހަވާލުކުރާއިރު މިފަހަރުވެސް ކަރުދާސް ޗާޕުކުރަން ހުށައެޅި ބިޑު ކާމިޔާބުކުރީ އެތަނުން ކަމަށެވެ. ނޮވެލްޓީ އިން ހުށައެޅި ބިޑަކީ ސެކިއުރިޓީ ފީޗާސް ގިނަ އަދި އަގު ހެޔޮ ބިޑެއް ކަމަށާއި އެމް 7 ބުކްޝޮޕަށް ބިޑް ދީފައިވަނީ ނޮވެލްޓީ އިން ކާމިޔާބުކޮށްފައިވަނިކޮށް ކަމަށް ޔާމީން ވިދާޅުވިއެވެ.
އެކަމާ ގުޅިގެން އީސީ ރައީސް އަހުމަދު ޝަރީފަށް ގުޅުއްވުމުން ޝަރީފް ވިދާޅުވީ ނޮވެލްޓީން އިތުރު ފީޗާއެއް ހިމަނާނެ ކަމަށެވެ. އަދި އެކަމާ ހިތްހަމަނުޖެހުން ފާޅުކުރުމުން ދެވަނަ ފަހަރަށް ބިޑަށް ހުށައަޅައި ބޭރުގެ ފަރާތްތަކަށް ވެސް ކުރިމަތިލެވޭ ގޮތަށް ހަދާނެ ކަމަށް ވިދާޅުވެ މައްސަލަ ދަންމަވާލެއްވި ކަމަށެވެ. އަދި އެފަހުން ބިޑެއް އިއުލާންކޮށްފައިވެސް ނުވާ ކަމަށާއި ހަމަ އެ ބިޑް ލިބުނީ އެމް 7 އަށް ކަން ޔާމީން ފާހަގަކުރެއްވިއެވެ.
ތިންވަނަ ކަމަކަށް ރައީސް ޔާމީން ފާހަގަކުރެއްވި ކަމަކީ ކެމްޕޭނަށް އެމަނިކުފާނު ރަށްތަކަށް ޒިޔާރަތްކުރެއްވުމުން ލިބުނު ހޫނު ތަރުހީބެވެ. ޔާމީން ވަނީ އެފަދަ ބޮޑު ތަރުހީބެއް ލިބުމަށް ފަހު ވޯޓު ކަރުދާސް ގުނުމުން އެތަރުހީބު ނުފެންނަން ޖެހޭ ސަބަބެއް ނެތް ކަމަށް ގަބޫލުކުރައްވާ ކަމަށް ދޭހަވާ ގޮތަށް ވާހަކަ ދައްކަވާފައެވެ.
ބޮޑު ތަރުހީބު ލިބުނު ރަށްތަކުން ފަންސާސް އިންސައްތަ ވެސް ލިބިވަޑައިނުގެންނެވި ކަން ފާހަގަކުރައްވައި އެކަމުގައި ވަރަށް ބޮޑެތި ސުވާލުތަކެއް އުފެދޭ ކަން ޔާމީން ފާހަގަކުރެއްވިއެވެ. އިންތިޚާބުން ބަލިވުމަށް ފަހު ރައީސް އޮފީހުގެ ތަރުޖަމާނަކަށް ހުންނެވި އިބްރާހިމް މުއާޒު އަލީ ވަނީ ވޯޓު ކަރުދާހުގައި ޔާމީނާވީ ގޮޅީގައި ފާހަގަ ޖެހުމުން ފާހަގަ ތިރިއަށް ވެއްޓުނު ކަމަށް މީހަކު ހުވާކޮށްފައި ބުނެފައިވާ ކަމަށް އެއްވުމެއްގެ ތެރޭގައި ބުނެފައެވެ. ނަމަވެސް ފަހުން މުއާޒު ވަނީ ރައީސް ޔާމީނާ ދެކޮޅަށް ވާޙަކަތަކެއް ދައްކަވާފައެވެ.
އިންތިޚާބުން ބަލިވުމުން ޔާމީންގެ ފަރާތުން އިންތިޚާބު ބާތިލުކޮށްދިނުމަށް އެދި ސުޕްރީމް ކޯޓަށް ދުސްތޫރީ މައްސަލައެއް ވެސް ހުށައެޅިއެވެ. ނަމަވެސް ސުޕްރީމް ކޯޓުގެ ފަސް ފަނޑިޔާރުންގެ އިއްތިފާގުން ވަނީ، ޔާމީންގެ ފަރާތުން ހުށައެޅި ހުށައެޅުންތަކުގައި އިންތިޚާބު ބާތިލުކުރަން ޖެހޭ އެއްވެސް ސަބަބެއް ނެތް ކަމަށް ނިންމައި އިންތިޚާބު ބާތިލުނުކުރެވޭނެ ކަމަށް ހުކުމް ކޮށްފައެވެ.