ބޭންކު އޮފް މޯލްޑިވްސްގެ ޑެޕިއުޓީ ސީއީއޯ މުހައްމަދު ޝަރީފު މަޖްލިސްގެ މާލިއްޔަތު ކޮމެޓީގައި ސައްހަ ނޫން މައުލޫމާތު ދެއްވި މައްސަލައިގެ ޖިނާއީ ތަހްގީގު ކުރިއަށްދާކަމަށް ފުލުހުން ބުނެފިއެވެ.
ޝަރީފުގެ މައްސަލަ ފުލުހަށް ތަހްގީގު ކުރުމަށް ހުށަހަޅާފައިވަނީ ރައްޔިތުންގެ މަޖިލީހުގެ ރައީސް މުހައްމަދު ނަޝީދުއެވެ. ނަޝީދު ވިދާޅުވީ ޝަރީފުގެ މައްސަލަ ތަހްގީގު ކުރުމަށް ހުށަހެޅީ މަޖްލިސްގެ ކޮމެޓީއަށް އޮޅުވާލާފައިވާތީ ކަމަށެވެ. މި މައްސަލާގައި ޝަރީފުގެ މައްސަލަ ތަހްގީގު ކުރުމަށް ނުފޮނުވަންވެސް މަޖްލިސް އިން ނިންމިއެވެ. ނަމަވެސް ފަހުން މަޖްލިސް އިން ވަނީ މި މައްސަލަ ތަހްގީގު ކުރުމަށް ފޮނުއްވާފައެވެ.
މި މައްސަލާއި ގުޅިގެން ފުލުހުން އެއްވެސް އިތުރު މައުލޫމާތެއް ހިއްސާ ނުކުރިއެވެ. ފުލުހުން ހަމައެކަނި ދިން ޖަވާބަކީ މައްސަލަ ތަހްްގީގު ކުރަމުން އަންނަ ކަމަށެވެ.
ޝަރީފުގެ މައްސަލަ އާއި ގުޅޭ ގޮތުން ނަޝީދު ވިދާޅުވީ ޝަރީފުގެ ސިޓީގައި ވަރަށް ސާފުކޮށް ޗެކް އެންޑޯޒްކުރާ ގޮތް ކިޔައި ދެއްވާފައިވާ ކަމަށެވެ. އަދި މަޖްލިސް މެމްބަރުން ކުރެއްވި ސުވާލުތަކަށް ޖަވާބު ދެއްވަމުން ގާނޫނާއި ގަވާއިދާއި ހިލާފަށް ބޭންކުގެ އާއްމު އުސޫލުން އެއްވެސް ޗެކެއް ޖަމާކޮށްފައި ނުވާނެކަމަށް ޝަރީފު މާލިއްޔަތު ކޮމެޓީގައި ވާހަކަފުޅު ދައްކަވާފައިވާ ކަމަށެވެ.
ނަމަވެސް އޭގެ ފަހުން އެމްއެމްޕީއާރުސީއަށް ލިބެން ޖެހޭ ކޮރޮސް ޗެކުތަކެއްގެ ފޮޓޯ ސޯޝަލް މީޑިއާގައި ދައުރުވެފައިވާ އިރު އެ ޗެކުތަކުގެ ފޮޓޯ މެމްބަރުންގެ ޕޯޓަލްއަށް ފޮނުވާފައިވާ ކަމަށް ނަޝީދު ވިދާޅުވިއެވެ.
އެމްއެމްޕީއާރުސީ މެދުވެރިކޮށް ދައުލަތަށް ލިބެން ޖެހޭ 1.3 ބިލިއަން ރުފިޔާގެ ފައިސާގެ ތެރެއިން ބައެއް ފައިސާތައް އެކައުންޓުތަކަށް ޖަމާކޮށްފައިވަނީ ބީއެމްއެލް މެދުވެރިކޮށެވެ. މި މައްސަލާގައި ބޭންކަށް ބޮޑެތި ތުހުމަތުތަކެއް ކުރެވޭ އިރު ބޭންކުން އަންނަނީ ދިފާއުގައި ބަޔާންތައް ނެރެމުންނެވެ. ބޭންކުން ބުނެފައިވަނީ އެމްއެެމްޕީއާރުސީ މައްސަލާގައި ބޭންކުން އަމަލުކޮށްފައިވަނީ ގަވާއިދާއި އެއްގޮތަށް ކަމަށެވެ.