ރޯގާ، ސައިނަސް އަދި އަޑު ހަލާކުވުން ފަދަ ކަންކަން ރަނގަޅުކުރުމަށް އަބަދުވެސް އެންމެ ރަނގަޅުކަމަށް ބުނެ އުޅެނީ ލުނބޯ، މާމުއި އަދި އިނގުރުކަމަށެވެ. ނަމަވެސް މި ތަކެތިން ސަޔާއި، އާވި އެރުވުމުގެ ތެރޭގައި ބޭނުން ކުރަންޖެހޭ އެންމެ މުހިންމު އެއް ބައި ކަމަށްވާ އަސޭމިރުސް، އޮންނަނީ ހަނދާންނެތިފައެވެ.
އަސޭމިރުހަކީ އޭގެ ޒާތުގައި ރޯގާ ބޭރުކޮށް، ބެކްޓީރިއާގެ ޒަރީއާއިން އުފެދޭ އިންފެކްޝަންތައް ހައްލުކުރުމަށް މަސައްކަތްކުރާ އެއްޗެކެވެ. މާމުޔާއި އަސޭމިރުސް އެއްކުރުމުން އަދި ވަކިން ކުރާ އަސަރު ރަނގަޅެވެ. ސަބަބަކީ މާމުޔަކީވެސް ކެއްސުން ހުއްޓުވުމަށް ވަރަށް ބޮޑަށް މަސައްކަތްކުރާ އެއްޗަކަށްވާތީއެވެ. މީގެ އިތުރުން އޭގައި ހުންނަ އެންޓިއޮކްސިޑެންޓަކީވެސް ހަށިގަނޑުގެ ދިފާއީ ނިޒާމު ވަރުގަދަކޮށްދޭ އެއްޗެކެވެ.
އަސޭމިރުސް ސައި:
އާދައިގެކޮށް ސައި ގިރާގޮތަށް ހޫނު ފެނަށް ސައިފަތް ޕެކެޓު އަޅައި، 1 ސައިސަމުސާ އަސޭމިރުސް އަޅައި، ހަކުރުގެ ބަދަލުގައި 2 ސައިސަމުސާ މާމުއި އަޅާފައި ރަނގަޅަށް ގިރާލާށެވެ.
އަސޭމިރުހާއި ފެނު ކެއްކި ބިސް:
ކަރު ސަކަރާތްވުމުން ލުނބޯ ބޭނުންކުރުމުގެ ބަދަލުގައި ކާން އެންމެ ރަނގަޅު އެއްޗަކީ ފެނު ކެއްކި ބިހާއި މުގުރި އަސޭމިރުސް ޖައްސައިގެންނެވެ. ލުނބޯއަކީ އޭގެ ޒާތުގައި ތަންކޮޅެއް އެސިޑް ހުންނަ އެއްޗެއްކަމުން ކަރު ހަލާކުވެފައި ހުންނަ އިރު އަވަހަށް ފަސޭހަ ކުރަން އެންމެ ރަނގަޅު އެއްޗަކަށް ނުވެއެވެ. ނަމަވެސް ފެނު ކެއްކި ބިހަކީ މަޑު އެއްޗަކަށްވެފައި، އަސޭމިރުހާއި އެއްކޮށް ކެއުމުން ކަރުގައި ހުންނަ ރޯގާ ފަސޭހަކޮށް އަޑު ރަނގަޅުކުރަން އެންމެ ރަނގަޅު އެއްޗަކަށްވާނެއެވެ. އެހެންކަމުން، ދެން ރޯގާ ޖެހޭ ފަހަރަކު އަސޭމިރުސް މިގޮތަށް ބޭނުންކޮށްލާށެވެ.