އިންޑިއަން އޯޝަން އައިލެންޑު ގޭމްސްގައި ރާއްޖެ ފަހުރުވެރިވާފަދަ ރަން ވަނަ ހޯދި ދިވެހި ޓީމު ބަލާ މޯލްޑިވިއަންގެ ބޯޓު މޮރިޝަސްއަށް ފުރައިފިއެވެ.
ރާއްޖޭގެ ޓީމު އައިއޯއައިޖީ މުބާރާތަށް ގެންދިޔައީވެސް މޯލްޑިވިއަންއިންނެވެ.
މޯލްޑިވިއަންގެ ބޯޓު ޓީމު ބަލާ މޮރިޝަސްއަށް ދިޔައީ ގައުމީ ޓީމުގެ ޖާޒީގައެވެ. މި މުބާރާތުން ރާއްޖެ ވަނީ 15 މެޑަލް ހޯދާފައެވެ. މީގެ ތެރޭގައި ޓީޓީ އާއި މެޑްމިންޓަނުން ރާއްޖެ ވަނީ ރަން މެޑަލް ހޯދާފައެެވެ. ރާއްޖެއިން މިފަހަރު ވަނީ ހަތަރު ރަން މެޑަލް ހޯދާފައެވެ. އެއީ ޓީޓީ ސިންގަލް އަދި ޑަބަލްގެ އިތުރުން ޓީޓީ ޓީމު އިވެންޓުން ހޯދި ތިން ރަން މެޑަލް އާއި ބެޑްމިންޓަން ސިންގަލްސްއިން ނަބީހާ ހޯދި ރަން މެޑަލްއެވެ.
ރާއްޖޭގެ ޓީމު މިފަހަރު އައިއޯއައިޖީއަށް ފުރީވެސް 15 މެޑަލްގެ ޓާގެޓާއި އެކުއެވެ. އެ ޓާގެޓު ހަމަވި އިރު ބެޑްމިންޓަން އާއި ޓީޓީން ރާއްޖެވަނީ ސަރަހައްދުގައި ވިދާލާފައެެވެ.
ރާއްޖޭގެ ޓީމަށް ރަސްމީ ފާލަން ސަރަހައްދުން ހޫނު މަރުހަބާއެއް ކިއުމަށް ތައްޔާރުވަމުން އަންނަ އިރު ޓީމަށް ރާއްޖެ އާދެވޭނީ މިއަދު ހަވީރުއެވެ.