ރާއްޖޭގައި ދެ އަންބަށް ކައިވެނި ކޮށްދެވޭނީ ދޮށީ އަނބީގެ ބަހެއް އޮވެގެން ކަމަށް ސުޕްރީމް ކޯޓުން ކަނޑައަޅައިފިއެވެ.
ކުރިންވެސް މިއުސޫލަށް އަމަލުކުރަމުން ދިޔަ ނަމަވެސް ފަހުން މިއުސޫލަށް އަމަލުނުކޮށް، ބަޔާނެއް ނެތި ކައިވެނި ކޮށްދެއެވެ. އެހެންވެ އެފަދަ ކައިވެނިތައް ކޮށްދެވޭނީ މީގެ ފަހުން ދޮށީ އަނބީގެ ބަޔާން ނެގުމަށް ފަހު ކަމަށް ސުޕްރީމް ކޯޓުން ނެރުނު ސާކިއުލާއެއް ގައި ބަޔާންކޮށްފައިވެއެވެ.
ސުޕްރީމް ކޯޓުން މިގޮތަށް ހަމަޖެއްސީ ޢާއިލާއާ ބެހޭ ޤަވާޢިދުގެ 19 ވަނަ މާއްދާގެ (ހ) ގައިވާ ގޮތުގެ މަތިން އެއް އަންބަށްވުރެ ގިނަ އަންބަށް ކާވެނިކުރަންއުޅޭ ފިރިހެނާއަކީ އެ ފިރިހެނާ އިނދެގެންއުޅޭ އަނބިމީހާއަށާއި ދަރިންނަށް ކުރަންޖެހޭ ޚަރަދު ކުރަމުންގެންދާ މީހަކުކަން ކަށަވަރު ކުރުމުގެ ގޮތުން ކަމަށެވެ.
މިސާކިއުލާގައި އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ ވަނީ ސޮއިކުރައްވާފައެވެ. ރާއްޖޭގައި ދެ އަންބަށް ނުވަތަ ގިނައިން ކައިވެނި ކުރުން ގިނަ ވެފައިވާއިރު ބައެއް އަނބިންނާއި ދަރިންނަށް ފިރިމީހާ ޚަރަދު ނުކުރާ ކަމަށް ބުނެ މައްސަލަ ޖައްސާކަން ފާހަގަކޮށްލެވެއެވެ.