ނޯޓް: މިއީ އައްޑޫ ޑެޕިއުޓީ މޭޔަރު އަދި ހުޅުމީދޫ ދާއިރާގެ ކައުންސިލަރު ހަސަން ޝާހިދު އޭނާގެ ބްލޮގް "ވެލްކަމް ޓް ޝާހިދު ލައިވް" ގައި ޖޫން 23، 2013 ވަނަ ދުވަހު ޝާއިއުކޮށްފައިވާ ލިއުމެކެވެ. ކިޔުންތެރިން އިންސާފުކޮށްލައްވާށެެވެ.
—————————————————
އެއްވެސް ޝައްކެތް ނެތް ގޮތުގައި، އައްޑޫ ސިޓީ އާއި ރައްޖޭގެ ބޮޑެތި އާބާދީތައް ހުރި ރަށްތައް ތަރައްޤީވެގެން ނޫނީ، މި ރާއްޖެއަކަށް ތަރައްޤީއެއް ނެތެވެ. މާލެ އަށް އޮތް ހާސްކަން ފިލާނެ ގޮތެއް ނެތެވެ. މި ހަޤީގަތް ހުރިހާ ސިޔާސީ ފަރާތްތަކުން ގަބޫލު ކުރެ އެވެ.
ނަމަވެސް މިހާތަނަށް ރާއްޖޭގެ ތަރައްޤީ ބިނާވެފައި އޮތީ، ޚުދުމުހުތާރު ވެރިކަމެއް ދެމެހެއްޓުމުގެ ސިޔާސަތެއްގެ މައްޗަށެވެ. މާލެ އަށް ބައި ބޯކޮށް ރައްޔިތުން ބިކަ ކުރުމުގެ ސިޔާސަތުގެ މައްޗަށެވެ.
މިދެންނެވި އަނިޔާވެރި ސިޔާސަތުތަކަށް ދިވެހި ރައްޔިތުންގެ ތެރެއިން ބަޔަކު އަބަދުވެސް ދެކޮޅު ހަދަ އެވެ. އެގޮތުން އައްޑޫ ރައްޔިތުން އަބަދުވެސް ފާހަގަ ކުރެވިފައި އޮންނަނީ، އަނިޔާވެރިކަމާއި ދެކޮޅަށް ފާޅުގައި ދެތުވެ އަޑު އުފުލާ ބައެއްގެ ގޮތުގަ އެވެ.
ނަތީޖާއެއްގެ ގޮތުން އައްޑޫގެ ރައްޔިތުން ބައިބައިކޮށް، ނިކަމެތި ކޮށްލުމަކީ ސަރުކާރުގެ ކާމިޔާބީއެއްގެ ގޮތުގައި އަބަދު ވެސް ސަރުކާރުގެ ވެރިން ދެކެމުން އަ އެވެ.
އައްޑޫގެ ތަރައްޤީ އާ ގުޅޭ ގޮތުން ސަރުކާރުގެ މިނިސްޓަރުން ފެންވަރުގައި ދެކެވޭ ވާހަކަތަކުގައި، އައްޑޫ ރައްޔިތުންނަކީ، ސްރީލަންކާގެ ނިސްބަތުން ތަމަޅައިން ކަމަށްބުނެފައި އެބަ ހުއްޓެވެ. ސުރުޚީ އަށް ދިއުމުގެ ކުރީން މި ވާހަކަތައް ލިޔެލެވުނީ، މި ދުވަސްވަރަކީ ރިޔާސީ އިންތިޚާބަކަށް ތައްޔާރުވަމުންދާ ދުވަސްވަރަކަށް ވެފައި، އައްޑޫ ތަރައްޤީ ކުރާ ވާހަކަ، މެދުނުކެނޑި ދައްކަމުން ދާތީވެ، އެވާހަކަ ދައްކަވާ ބޭފުޅުންގެ އިޚްލާސްތެރި ކަމާއި މެދު ވިސްނުމަށް ފުރުސަތު ދިނުމަށްޓަކަ އެވެ.
ކޮންމެއަކަސް، އައްޑޫ ރައްޔިތުންގެ ރުހުމާއި ނުލައި މި ރާއްޖޭގެ ވެރިކަމެއް ކުރުން މިހާރު މިވަނީ ބޮޑު ކަމަކަށްވެފަ އެވެ. އެހެންކަމުން، އިޚްލާސްތެރި ކަމެއް ނެތަސް، އައްޑޫގެ ރަައްޔިތުންނަށް ކަންތައްތަކެއް ކޮށްދޭން އޭރަކު އޮންނަ ސަރުކާރަކަށް ވަނީ މަޖުބޫރުވެފަ އެވެ.
ބާޣީ ސަރުކާރެއް ކަމަށްވިޔަސް، ރައްޔިތުންގެ ސަރުކާރެއްވިޔަސް، އައްޑޫ ރައްޔިތުންގެ ރުހުން ހޯދެން އޮތް ގޮތަކަށް ހޯދަން އެބަ ޖެހެ އެވެ. ފެބްރުއަރީ 7، 2012 ވަނަ ދުވަހާ ހަމަޔަށް އޮތް އެމްޑީޕީގެ ވެރިކަމަކީ އައްޑޫ ރައްޔިތުންގެ ނުހަނު ބޮޑު ތާއީދަކާ އެކު އިންތިޚާބު ވެފައި އޮތް ސަރުކާރެކެވެ.
އެހެންކަމުން އެ ސަރުކާރުން އައްޑޫގެ ތަރައްޤީ އަށް ބޮޑެތި މަސައްކަތްތަކެއް ކުރި އެވެ. ހަމައެއާ އެކު، ސިޔާސީ ބޭނުމަކަށްޓަކައި، ހެދުނު ބައެއް ޑީލް ތަކުގެ ސަބަބުން އައްޑޫ ރައްޔިތުންނަށް ގެއްލުންތައް ވެފައިވެސް އެބަ ހުއްޓެވެ. ކޮންމެ ގޮތަކަށް މިނެ ކިރާލި ކަމުގައި ވިޔަސް، މައުމޫނުގެ ދިގު 30 އަހަރު އައްޑޫ އިން ނުހޯދުނު ތާއީދު އެއްމެ 3 އަހަރު ތެރޭގައި ރައީސް ނަޝީދު ހޯއްދެވި އެވެ.
ފެބްރުއަރީ 7، 2012 ވަނަ ދުވަހު “ބަޣާވާތަކުން” ރާއްޖޭގެ ވެރިކަން ބަދަލުކޮށް، ވެރިކަމާއި ހަވާލުވި ޑރ. ވަހީދު ހަސަން މަނިކުގެ ސަރުކާރަށް ކުރިމަތިލާން ޖެހުނު އެއްމެ ބޮޑު ގޮންޖެހުމަކަށްވީ، އައްޑޫ ރައްޔިތުންގެ ހިތުގައި ރައީސް ނަޝީދަށް ދެވިފައިވާ ލޯބި ފޮހެލާނެ ގޮތެއް ހޯދުމެވެ.
ހަމައެހެންމެ، ވެރިކަމުގެ ބާރު ގަދަކުރުމަށްޓަކައިި، އައްޑު އާއި އެއްފަދައިން ރާއްޖޭގެ އެހެން ބޮޑެތި އާބާދީތައް މައިތިރި ކުރުމަކީ ވެސް މުހިއްމު ކަމެއްކަން އާ ސަރުކާރަށް ވިސްނުނެވެ.
މިގޮތުން ތަދުބީރު ތަންފީޒު ކުރީ ފެބްރުއަރީ 8 ވަނަ ދުވަހު އެވެ. “ބަޣާވާތާއި” ދެކޮޅަށް މުޅި ރާއްޖެ ކުރި މުޒާހަރާގެ ތެރެއިން، އައްޑޫ ބޮޑު ހުޅުގެ ޖަރީމާ ހިންގި އެވެ. އެ ޖަރީމާއަކީ، އެމްޑީޕީ އިން ހިންގި ކަމެއްގެ ގޮތުގައި ދެއްކުމަށްޓަކައި، އައްޑޫ ސިޓީގެ މޭޔަރު ފިޔަވައި ދެން ތިބި ހުރިހާ ކައުންސިލަރުން ހިފާ ހައްޔަރު ކުރި އެވެ.
މޭޔަރު އޮފީސް ތެރޭގައި ހުއްޓާ ބަޔަކު ގޮސް މާރާމާރި ހިންގި އެވެ. އާ ސަރުކާރާއި ގުޅިފައިވާ ފަރާތްތަކުން، ސިޓީ ކައުންސިލްގެ ޑިޕާޓްމަންޓްތަކަށް ވަދެ، އަމިއްލަޔަށް ކައުންސިލް މެމްބަރުކަމުގެ ހުވާކޮށް، އެެއިގެ ތެރެއިން އެކަކު އަމިއްލަ އަށް ސިޓީގެ މޭޔަރަށް ވެގެން، މޭޔަރުގެ އޮފީހުގައި އަމުރު މައުރޫފު ހިންގަން އުޅުނެވެ.
މީގެ އިތުރުން، ސިޓީ ކައުންސިލުން އުފައްދާފައިވާ ސިޓީ ޑިޕާޓްމަންޓްތަކުގެ ނަންބޯޑު ބަދަލުކޮށް، ކުރީގެ ރަށު އޮފީސްގެ ނަމުގައި ރަސްމީ ލިޔެކިއުންތައް ބަދަލު ކުރި އެވެ.
މިޖަރީމާ ހިންގިތާ މިއަދަށް މިވީ 1 އަހަރާއި، 4 މަހާއި 16 ދުވަހެއެވެ. ރިޔާސީ އިންތިޚާބުގެ ވޯޓު ލުމާއި މިއަދާއި ދެމެދަށް އޮތީ، 76 ދުވަހެވެ.
އަނިޔާވެރި ޖަރީމާތަކުން ކާމިޔާބެއް ނުލިބުނުކަން އެނގުމުން، ދެން ސަރުކާރުން މަސައްކަތްކުރަންފެށީ، ތަރައްޤީއޭ ކިޔައިގެން ކަމެއް ކުރެވޭތޯއެވެ. އެގޮތުން އެމް.ޑީ.ޕީ ސަރުކާރުން އައްޑޫގެ މަގުތައް ރަނގަޅުފެންވަރަކަށް ހެދުމަށް ގެނެސްފައިވާ ސާމާނު ބޭނުންކޮށްގެން މަގުތައް ހެދުމުގެ އާ މަޝްރޫއެއް ހިންގަނީ ކަމަށް ދެއްކުމުގެ ގޮތުން ރަސްމިއްޔާތުތަކެއް ބާއްވައި ހެދި އެވެ.
ހަމަ އެގޮތައް ބޯފެނުގެ ނިޒާމާއި، އެއާޕޯޓް ތަރައްޤީ ކުރުމުގެ މަޝްރޫއާއި، ނުވިތާކަށް ސާކް ސަމިޓްގައި ހުޅުވާފައި ހުރި އެއާޕޯޓްގެ ވީއަޕީ ލައުންޖް ވެސް ހުޅުއްވައި ދެއްވި އެވެ. ޑރ. ވަހީދުގެ ސަރުކާރުން އައްޑޫގެ ތަރައްޤީއަށް ކޮށްދެވުނު ކަމެއް ނެތެވެ. ސަރުކާރުން އެ އިފްތިތާހު ކުރި ހުރިހާ މަޝްރޫޢުތަކަކީ، އެމް.ޑީ.ޕީ ސަރުކާރު އޮޮތްނަމަ މިޔަދު ނިމިފައި ހުންނާނެ މަޝްރޫޢުތަކެވެ.
ރައްޔިތުން އިންތިޚާބުކުރި ސަރުކާރު ބަދަލުވުމާއެކު، އައްޑޫގެ ތަރައްޤީ ވަނީ ހުއްޓިފައެވެ. ކޮންވެންޝަން ސެންޓު ވަނީ ވީރާނާވާން ދޫކޮށްލާފައެވެ. 100 އެނދުގެ ހޮސްޕިޓަލްގެ މަޝްރޫޢު ވަނީ ހުއްޓިފަ އެވެ. ހައުސިން ޔުނިޓްގެ މަޝްރޫއަށް ފެށޭނެ ދުވަހެއް ނޭގެއެވެ. ހަދަން ފަށާފައިވާ ބަނދަރުތަކުގެ މަސައްކަތް އެކަށީގެންވާ ގޮތަކަށް ކުރިޔަށް ނުދެ އެވެ. ފެނާއި ނަރުދަމާގެ ނިޒާމްގެ މަޝްރޫޢު ވަނީ ހުއްޓިފައެވެ. ދަތުރުފަތުރުގެ ޚިދުމަތާއި ސިއްޙީ ނިޒާމްގެ ފެންވަރު ވަނީ ދަށަށް ގޮސްފަ އެވެ.
މި ހުރިހާ ކަމެއް މިހެން ހުރުމާ އެކު، ކުރިއަށް އޮތް ރިޔާސީ އިންތިޚާބުގައި ވޯޓު ލުމުގެ ކުރިން އައްޑޫގެ ތަރައްޤީ އާ މެދު ވިސްނަން އެބަ ޖެހެ އެވެ.
ސިޔާސީ ފަރާތްތަކުން ދައްކަވާ ވާހަކަތަކަށް ހަމައެކަނި ބުރަވެ، ނޫނީ ވަކި ސިޔާސީ ޕާޓީއަކަށް ބުރަވެ ވޯޓު ކަރުދާސްކޮޅު ވައްޓާލުމުގެ ބަދަލުގައި، ވެރިކަމަށް ކުރިމަތި ލައްވާފައިވާ ބޭފުޅުން، ނުވަތަ އެބޭފުޅުން ނިސްބަތްވާ ޕާޓީގެ ވެރިކަމުގައި، އައްޑޫގެ ތަރައްޤީއަށް ކޮށް ދެއްވާފައި ވަނީ ކޮން ކަމެއްތޯ ސުވާލު ކުރަން ޖެހެ އެވެ.