މަސްތުވާތަކެތީގެ ދެ މައްސަލައެއްގައި 32 އަހަރުގެ ޖަލަށް ލާފައިވާ ސ. ހިތަދޫ މީހަކު ޑްރަގް ކޯޓުގެ ފަރުވާގެ ޕްރޮގްރާމް ފުރިހަމަ ކުރުމާ ގުޅިގެން ހުކުމްތަކުން ބަރީއަވެ، އިއްޔެ މިނިވަންވެއްޖެ އެވެ.
ހިތަދޫ ރިހިދޯދި ޝަރަފުއްދީން ޑްރަގް ކޯޓުގެ ފަރުވާގައި ބައިވެރިކޮށް ދޭން ނެޝަނަލް ޑްރަގް އެޖެންސީ (އެންޑީއޭ) އިން ކޯޓަށް ހުށަހެޅި އިރު އޭނާ ދިޔައީ 25 އަހަރުގެ ޖަލު ހުކުމެއް ތަންފީޒު ކުރަމުންނެވެ. އަދި އެ ހުކުމް ތަންފީޒުކޮށް ނިމުމުން އިތުރަށް ތަންފީޒުކުރަން ޖެހޭ 12 އަހަރުގެ ޖަލު ހުކުމެއް ވެސް އޮތް ކަމަށް އެންޑީއޭ އިން ބުންޏެވެ.
ނަމަވެސް ޑްރަގް ކޯޓުގެ ފަރުވާގައި ބައިވެރިވުމާ އެކު އޭނާގެ ޖަލު ހުކުމް ތަންފީޒު ކުރުން މަޑުޖައްސާލުމަށް އަމުރުކޮށް އޭނާގެ ފަރުވާގެ ޕްރޮގްރާމް ފަށާފައި ވެ އެވެ.
ފަރުވާގެ އުސޫލާ އެއްގޮތަށް ފަރުވާ ފުރިހަމަ ކުރުމާ އެކު ޝަރަފުއްދީންގެ މައްޗަށް އިއްވާފައިވާ 25 އަހަރުގެ ޖަލު ހުކުމާއި 12 އަހަރުގެ ޖަލު ހުކުމް ވެސް ޑްރަގް ކޯޓުން ވަނީ ބާތިލްކޮށްފަ އެވެ.
އެހެންވެ ޑްރަގް ކޯޓުން ކޮށްފައިވާ ހުކުމުގައި ބުނެފައި ވަނީ އެއްވެސް ޝަރުތަކާ ނުލައި އޭނާ މިނިވަން ކުރުމަށް އަމުރުކޮށްފަ އެވެ.