މާލޭގައި ޓެކްސީ ކުރުމުގެ އުސޫލަށް ސަރުކާރުން ގެންނަން އުޅޭ ބަދަލާ މެދު ހިތްހަމަނުޖެހި ޓެކްސީ ޑްރައިވަރުން އެކަން ހުއްޓުވުމަށް ކޯޓަށް މައްސަލަ ހުށައަޅަން ތައްޔާރުވެއްޖެއެވެ.
ޓެކްސީ ޑްރައިވަރުން ހިމެނޭ ޖަމިއްޔާއެއް ވެސް އުފައްދާފައިވާއިރު އެޖަމިއްޔާގެ ވަގުތީ ރައީސް ވަނީ "މިހާރު" ނޫހަށް އިންޓަވިއު ދެމުން މައްސަލަ ހުށައަޅަން ނިންމާފައިވާކަން ކަށަވަރުކޮށްދީފައެވެ. އޭނާ ބުނެފައިވަނީ މާދަމާ މިމައްސަލަ ކޯޓަށް ވައްދަން ނިންމާފައިވާ ކަމަށެވެ.
ޑްރައިވަރުންގެ ޖަމިއްޔާއިން އެންމެ ބޮޑަށް ނުރުހުން ފާޅުކޮށްފައިވަނީ ޓެކްސީ ދަތުރުތަކަށް ނެގޭނެ އެންމެ ކުޑަ އަގު ސަރުކާރުން ކަނޑައެޅުމުން، އެ އަގުތައް މާ ކުޑަ ކަމަށް ބުނެއެވެ. މި ޖަމިއްޔާއިން ދެކޭ ގޮތުގައި އެހާ އަގު ކުޑަކުރުމުން ޑްރައިވަރުންގެ އާމްދަނީއަށް ވަރަށް ބޮޑަށް އަސަރުކުރާނެ ކަމަށެވެ.
ސަރުކާރުން ނިންމާފައިވާ އާ އަގުތަކަކީ، މާލެއިން ހުޅުމާލެއަށް 75 ރުފިޔާ، މާލެއިން ވެލާނާ އިންޓަނޭޝަނަލް އެއާޕޯޓަށް 60 ރުފިޔާ އެވެ. އަދި މެންދަމު ވަގުތުތަކުގައި އަގުބޮޑުކުރުން ވެސް ނިމުމަކަށް ގެނައުމަށް މިއުސޫލާއެކު ސަރުކާރުން ވަނީ ނިންމާފައެވެ. މީގެ އިތުރުން ކާރުގެ ޑިކީއަށް އެއްޗެއް އަރުވާނަމަ އަގުބޮޑުނުކުރެވޭ ގޮތަށް ވެސް ވަނީ ހަދާފައެވެ. މިއަގުތަކަށް ވުރެ ބޮޑު އަގެއް ޓެކްސީ ދަތުރަކުން އެއްވެސް ޑްރައިވަރަކަށް ނުނެގޭނެ ގޮތަށް ސަރުކާރުން ވަނީ ކަނޑައަޅާފައެވެ.