އައްޑޫ އިކުއެޓޯރިއަލް ހޮސްޕިޓަލުގެ ފުރާޅު ބަދަލުކޮށް އެޑްމިން ސަރަހައްދާއި މައި އިމާރާތާ ދެމެދު ވޯކްވޭއެއް ހެދުމަށް ބީލަމަށް ހުށައަޅައިފިއެވެ.
މިދިޔަ މަހު ހޮސްޕިޓަލުގެ ފުރާޅު ބަދަލުކުރުމަށް މިނިސްޓްރީން ބީލަން އިއުލާންކޮށްފައިވާއިރު ދެވަނަ ފަހަރަށް މިމަސައްކަތަށް ހުޅުވާލީ ފުރަތަމަ ހުށައެޅުމަށް އެދެވޭ ތަރުހީބެއް ނުލިބުމުން އެ ހުށައެޅުން ބާތިލުކުރުމަށް ފަހުގައެވެ. ބިޑު ހުށައެޅުމުގެ ފުރުސަތު މިމަހުގެ 21 ވަނަ ދުވަހާއި ހަމައަށް ހުޅުވާލާފައިވާއިރު މިނިސްޓްރީން ވަނީ ބިޑް ސެކިއުރިޓީގެ ގޮތުގައި 40،000ރ. ބަހައްޓަން ޝަރުތުކޮށްފައެވެ.
ފުރާޅު ބަދަލުކުރަނީ އީސީސީ މަރާމާތުނުކޮށް ފާއިތުވެދިޔަ ސަރުކާރުތަކުން ވީރާނާ ކުރުމަށް ފުރުސަތު ދިނުމުން އެތަނުގެ ފުރާޅުން ފެން ވެއްޓޭތީއެވެ. ކުރީގެ ރައީސް ނަޝީދުގެ ވެރިކަމުގައި، 2011 ވަނަ އަހަރު އައްޑޫގައި ސާކް ސަމިޓް ބޭއްވުމަށް އެޅުނު ކޮންވެންޝަން ސެންޓަރުގެ ބޭނުން ނުހިފި އެއްލާލާފައިވަނީ ނަޝީދުގެ ވެރިކަން ވެއްޓުމަށް ފަހުގައެވެ.
އެތަން ހޮސްޕިޓަލަކަށް ހެދުމަށް ނިންމެވީ ކުރީގެ ރައީސް އަބްދުﷲ ޔާމީނެވެ. ހޮސްޕިޓަލުގެ މަސައްކަތް، ނިމިގެން ދިޔަ ރިޔާސީ އިންތިޚާބުގެ ކުރިން ނިންމައި ހުޅުވުމަށް އެމަނިކުފާނު މަސައްކަތް ކުރެއްވި ނަމަވެސް އެކަން ކުރެވޭ ގޮތެއް ނުވިއެވެ.
އީސީސީ ހޮސްޕިޓަލަށް ބޭނުންވާ ސާމާނާއި މެޝިނަރީ މިހާރު ގެނެސްފައިވާއިރު ފުރަތަމަ ފަހަރަށް އައްޑުއަށް ވަނީ އެމްއާރުއައި މެޝިނަކާއި ސިޓީ ސްކޭން ހަދާ މެޝިނެއް ގެނެސްފައެވެ. މިހާރު ކުރަމުންދަނީ މެޝިން އިންސްޓޯލް ކުރުމުގެ މަސައްކަތާއި ހޮސްޕިޓަލް ނިންމުމުގެ މަސައްކަތް ކަން ކަމަށް މައުލޫމާތު ލިބިފައިވެއެވެ.