ރާއްޖޭގެ ޓޫރިސްޓު ރިސޯޓުތަކުގައި ކެސީނޯ އެޅުމުގެ ޚިޔާލު ގެންގުޅުއްވި ނަމަވެސް ދުވަހަކުވެސް ކެސީނޯ ކުޅެ ނަހަދާ ކަމަށް ކާށިދޫ ދާއިރާގެ މެމްބަރު އަބްދުﷲ ޖާބިރު ވިދާޅުވެއްޖެއެވެ.
ޖާބިރު މިހެން ވިދާޅުވީ މިއަދުގެ ރައްޔިތުންގެ މަޖިލީހުގެ ޖަލްސާގައި ވާހަކަ ދައްކަވަމުންނެވެ. ކެސީނޯ އަޅަން ހުށައެޅުމުން އޭނާ ވަރުގެ ގޯސް މީހެއް ނެތް ކަމަށް ބެލެވެން ފެށި ކަމަށާއި ނަމަވެސް އެޚިޔާލު ހުށައެޅީ ކެސީނޯ ކުޅޭ ހިތަކުން ނޫން ކަމަށް ވިދާޅުވިއެވެ. އަދި ކެސީނޯ އަކީ ދުވަހަކުވެސް ކުޅުނު އެއްޗެއް ނޫން ކަމަށާއި ކުޅެން ނޭނގޭ ކަމަށް ވެސް ޖާބިރު ވިދާޅުވިއެވެ.
އެޚިޔާލު ހުށައެޅީ ކެސީނޯ ނާޅައި ރާއްޖޭގެ ޓޫރިޒަމް ދެން ކުރި ނާރާނެ ކަމަށް ދެކޭ ކަމަށް ވާތީ ކަމަށާއި ކެސީނޯ އަޅައިގެން ރާއްޖެއަށް ވަންނަ ޑޮލަރު އިތުރުވާނެ ކަމަށް ބެލެވޭ ކަމަށްވާނަމަ އެޚިޔާލު ހުށައަޅާނެ ކަމަށް ޖާބިރު ވިދާޅުވިއެވެ.
ރާއްޖޭގައި ކެސީނޯ އަޅަން ހުއްދަ ނުދެވޭނެ ކަމަށް ޓޫރިޒަމް މިނިސްޓަރ އަލީ ވަހީދު ވަނީ ވިދާޅުވެފައެވެ. ޖާބިރު ވެސް ހާޒިރުވެ ހުންނެވި ކޮމިޓީއެއްގައި މިނިސްޓަރު އެހެން ވިދާޅުވުމުން ޖާބިރު ވަނީ ވަރަށް ބޮޑަށް ކޯފާ އިސްކުރައްވައި އަލީ ވަހީދަށް ފާޑުވިދާޅުވެ ހުތުރު ބަހުންވެސް މުޚާތަބުކުރައްވާފައެވެ.