އަޟުހާ އީދު ކުލަގަދަކޮށް ފާހަގަ ކުރުމުގެ ގޮތުން އައްޑޫ ފްރެންޑްސްއިން ހައްބޯރާހި ޕެރޭޑޭއް ބާއްވަން ނިންމައިފިއެވެ.
އައްޑޫ ފްރެންޑްސްއިން ބުނީ އީދު ކުޅިވަރު ހިތަދޫގައި ފޯރިގަދަކޮށް ކުރިއަށް ގެންދިއުމުގެ ތައްޔާރީތައް ވަމުން އަންނައިރު އެންމެ ފާހަގަކޮށްލެވޭނެ އެއް ހަރަކާތަކީ ވަޅުއީދު ދުވަހު ހަވީރު ކުރިއަށްގެންދާ ހައްބޯރާހި ޕެރޭޑު ކަމަށެވެ.
ހައްބޯރާހި ޕެރޭޑުގައި ގިނަ އަދަދެއްގެ ބަޔަކު ބައިވެރިވާއިރު މި ޕެރޭޑު ފެށުމަށް ހަމަޖެހިފައިވަނީ ހިތަދޫ ސްކޫލް ކުރިމަތިންނެވެ.
އައްޑޫ ފްރެންޑްސްގެ އީދު ކުޅިވަރު މިފަހަރު ބާއްވަނީ ހިތަދޫ ބަނދަރު (ފަތާ ޓްރެކް ސަރަހައްދު)ގައެވެ. އެގޮތުން އީދު ދުވަހު ބާއްވާ ކުލަ މަޖާ އަދި އީދު ވިލޭރޭ އޮންނަ އީދު މަޅި ހަރަކާތްވެސް ބޭއްވުމަށް ހަމަޖެހިފައިވަނީ އެ ސަރަހައްދުގައެވެ.
މީގެ އިތުރުން މޫދު ކުޅިވަރު ހަރަކާތްތައްވެސް އެ ސަރަހައްދުގައި އީދު ބަންދުތެރޭގައި ބޭއްވުމަށް ވަނީ ހަމަޖެހިފައެެވެ.
އައްޑޫ ފްރެންޑްސްއިން ބުނީ މިފަހަރުގެ އީދުގައިވެސް ފޯރިގަދަ ގިނަ ހަރަކާތް ހިމެނިފައިވާނެކަމަށެވެ.