ނާސިން ހެދުން އެމްއެންޑީއެފް މެދުވެރިކޮށް

އިންޑިއާގެ ނިއުދިއްލީގައި ހުންނަ ސްކޫލް އޮފް ނާސިން އާމީ ހޮސްޕިޓަލުން މަތީ ތަޢުލީމު ހާސިލް ކުރުމުގެ ފުރުޞަތު އާއްމުކޮށް ހުޅުވާލައްވައިފިއެވެ.

އާންމުންނަށް ވެސް ބައިވެރި ވެވޭ ގޮތަށް އެމްއެންޑީއެފްގެ ޑައިރެކްޓަރޭޓް އޮފް ޕްލޭން ޕޮލިސީ އެންޑް ރިސޯސް މެނޭޖްމަންޓުން ޢިއުލާން ކުރައްވާފައިވާ މިކޯހަކީ ބެޗްލާސް ޑިގްރީ ފެންވަރުގެ ނާސިން ދާއިރާގެ ކޯހެކެވެ.

މި ކޯހުގައި ބައިވެރިވެވޭ ޝަރުޠުތަކުގެ ތެރޭގައި ޖީސީއީ އޭ ލެވެލް ފިޒިކްސް، ކެމިސްޓްރީ އަދި ބައިލޮޖީން ސީ ފާހަށް ވުރެ ދަށް ނޫން ގްރޭޑެއް ލިބިފައިވުމާއި އިނގިރޭސިި ބަހުން ރަނގަޅަށް ވާހަކަ ދައްކަން އެނގޭ އުމުރުން 18 އަހަރު ފުރި 25 އަހަރު ނުފުރޭ މީހެއް ކަމުގައި ވުން ހިމެނެ އެވެ. އަދި ކޯހުގައި ބައިވެރިވުމަށް ހުށަހަޅާ ފަރާތަކީ ޒަވާޖީ ހަޔާތެއް ފަށާފައިވާ މީހެއް ކަމުގައި ނުވުން ވެސް ކޯހުގެ ޝަރުޠުތަކުގެ ތެރޭގައި ހިމެނެ އެވެ.

ކޯހަށް މީހުން ހޮވުމަށް ހަމަޖެހިފައި ވަނީ ޝަރުޠު ހަމަވާ ފަރާތްތަކުގެ މެދުގައި ފިޒިކަލް ފިޓްނަސް ޓެސްޓެއް ބޭއްވުމަށް ފަހުގަ އެވެ. ސެޕްޓެމްބަރު، 13، 2013 އިން މާޗް 1، 2017 އާ ހަމައަށް ނިއުދިއްލީގައި ހިންގުމަށް ހަމަޖެހިފަިއވާ ކޯހަށް ޝައުޤުވެރިވާ ފަރާތްތަކުން އެޕްލިކޭޝަން ފޯމް ހުށަހެޅުމުގެ އެންމެ ފަހު ތާރީޚަކީ ޖުލައި މަހުގެ 1 ގެ ކުރިންނެވެ. އެޕްލިކޭޝަން ހުށަހަޅަން ޖެހެނީ އެމްއެންޑީއެފްގެ އިންޓަގްރޭޓެޑް ހެޑްކްއޯޓަސް ބަންޑާރަ ކޮށްޓަށެވެ.

މިކޯހުގެ ކޯސް އެޕްލިކޭޝަން ފޯމް އެމްއެންޑީއެފްގެ ވެބްސައިޓުން ޑައުންލޯޑް ކުރެވޭނެ އެވެ. އަދި ކޯހާ ބެހޭ އިތުރު މަޢުލޫމާތު ހޯއްދެވުމަށް ގުޅުއްވާނީ 3322607 އަށެވެ.