ބްލޮކް މޯޑަށް ކިޔަވައިދީގެން އެދެވޭ ގޮތެއްގައި ޓީޗިން ކޯސްތައް ނުހިންގޭނެ ކަމަށާއި، ކުލާސްރޫމަށް ކިޔަވައިދިނުމަށް ތަމްރީނު ކުރާ ޓީޗަރަކަށް 'ފޭސް-ޓު-ފޭސް' ތަމްރީނު މަދުވެގެން ތިން އަހަރުވަންދެން ލިބެން ޖެހޭ ކަމަށް އެޑިއުކޭޝަން މިނިސްޓަރ ޑރ. އާއިޝަތު އަލީ ވިދާޅުވެއްޖެއެވެ.
މިއަދު އެޑިއުކޭޝަން މިނިސްޓްރީން ބޭއްވި ނޫސްވެރިންގެ ބައްދަލުވުމެއްގައި މިނިސްޓަރ ވަނީ ބައެއް ސްކޫލުތަކުގައި ތިބި ޓީޗަރުންގެ ފެންވަރާ މެދު ކަންބޮޑުވުން ފާޅުކުރައްވާފައެވެ. މިނިސްޓަރު ވިދާޅުވީ، ބައެއް ރިލީފް ޓީޗަރުން ސްކޫލްތަކުގައި މިހާރުވެސް މަސައްކަތް ކުރަމުން އަންނަ ކަމަށާއި ރަނގަޅު ތަމްރީނު ނުލިބި ކިޔަވައިދޭން ފޮނުވުމަކީ ކަންބޮޑުވާ ކަމެއް ކަމަށެވެ.
ޚާއްސަކޮށް ޕްރައިމަރީ ގްރޭޑުތަކުގައި މިކަން ފާހަގަކުރެވޭއިރު އެއީ ކިޔަވާކުދިން ޅަފަތުގައި ކިޔެވުމަށް ފޫހިވާ އެއް ސަބަބު ކަމަށް ވެސް މިނިސްޓަރު ވިދާޅުވެފައިވެއެވެ.
ރާއްޖެއިން ބޭރުން ޓީޗަރުން ގެންނަން ޖެހެނީ ރަނގަޅަށް ތަމްރީނު ލިބިފައިތިބި ދިވެހި ޓީޗަރުން ހޯދަން ދަތިވެގެން ކަމަށް މި ބައްދަލުވުމުގައި މިނިސްޓަރު ވިދާޅުވެފައިވެއެވެ. ދިވެހި ޓީޗަރުން މަދުވެ ބޭރު ޓީޗަރުން ރާއްޖެ ގެންނަ މިންވަރު އިތުރުވުމާއެކު ގިނަ ފަރާތްތަކުން ވަނީ އެކަމާ ގުޅޭގޮތުން ކަންބޮޑުވުން ފާޅުކޮށްފައެވެ.
ދިވެހިން ކިޔަވައިދިނުމުގެ ދާއިރާއަށް ވަންނަ މިންވަރު އިތުރުނުވަނީ އުޖޫރަ ކުޑަކަމުން ކަމަށާއި ސަރުކާރުގެ އަމާޒަކީ ޓީޗަރުންގެ އުޖޫރަ ބޮޑުކޮށް އިނާޔަތްތައް އިތުރުކުރުން ކަމަށްވެސް މިނިސްޓަރު ވިދާޅުވެފައިވެއެވެ.