މީގެ ފަސް އަހަރު ކުރިން ވަގަށް ނަގާފައިވާ މޯލްޑިވްސް އިންޑެޕެންޑެންޓުގެ ނޫސްވެރިޔާ، އަހުމަދު ރިޟްވާން ވަގަށް ނެގި ޓެރަރިސްޓު ޖަމާއަތް ހޯދިއްޖެ ކަމަށާއި ތަހުގީގަށް އެނގުނު މައުލޫމާތު އާއިލާއާ ހިއްސާވެސް ކޮށްފައިވާނެ ކަމަށް މަރުތަކާ ބެހޭ ކޮމިޝަނުގެ ރައީސް ހުސްނުއް ސުއޫދު ވިދާޅުވެއްޖެއެވެ.
ސުއޫދު އިތުރަށް ވިދާޅުވީ މިމަސް ނިމުމުގެ ކުރިން ރިޟްވާން ވަގަށް ނެގި ޓެރަރިސްޓު ޖަމާއަތުގެ މައުލޫމާތު ހާމަކުރާނެ ކަމަށެވެ. ނަމަވެސް ކޮމިޝަނަށް ރިޟްވާން ވަގަށް ނެގުމަށް ފަހު ކަން ހިނގާދިޔަ ގޮތެއް އަދިވެސް ހޯދިފައިނުވާ ކަމަށް ސުއޫދު ވިދާޅުވެފައިވެއެވެ. އެކަމާ ގުޅޭގޮތުން ބޭނުންވާ މައުލޫމާތު ލިބިފައިވާ ކަމަށާއި، މިހާރު ކޮމިޝަނުން ކުރަމުން އަންނަ މަސައްކަތަކީ އެ މައުލޫމާތުގެ ސައްހަކަން ހޯދުން ކަމަށް އޭނާ ހާމަކޮށްފައިވެއެވެ.
ރިޟްވާން ވަގަށް ނެގިތާ މިއަދަށް 5 އަހަރު ވެފައިވާއިރު އާއިލާއިން ވަނީ ސަރުކާރުން ރިޟްވާނަށް ވީގޮތެއް ހޯދާނެ ކަމަށް ވިވައުދު ފުއްދުމުގައި ފެއިލް ވަމުން އަންނަ ކަމަށް ބުނެފައެވެ.
ރިޟްވާން ދިރިހުރިތޯ ނުވަތަ މަރާލާފައިވާ ކަން ކަށަވަރުކަމާއެކު ކޮމިޝަނުން އަދިވެސް ހާމަކޮށްފައިނުވާތީ އާއިލާއިން ކަންބޮޑުވުން ފާޅުކުރި ކަމަކީ އެއީ ކަމަށް ބެލެވެން އެބަ އޮތެވެ.
މިހާތަނަށް ފުލުހުން ހިންގި ތަހުގީގުގައި ރިޟްވާނަށް ފާރަލީ ކަމަށް ބުނާ މީހާއާއި އެކަމުގައި ބައިވެރިވި އިތުރު މީހަކު، ތުހުމަތު ކުރެވުނު ކުށް ސާބިތުކުރުމަށް ބޭނުންވާ ހެކި ނުދެއްކޭ ކަމަށް ބުނެ ކޯޓުން ވަނީ މިނިވަން ކޮށްފައެވެ.
ގޮތް ނޭނގޭ މަރުތަކާއި ގެއްލުވާލާފައިވާ މީހުންގެ މައްސަލަތައް ބެލުމަށް ރައީސުލް ޖުމުހޫރިއްޔާ އިބްރާހިމް މުހައްމަދު ސޯލިހްގެ ވެރިކަމުގެ ފުރަތަމަ ދުވަހު ވަނީ ރިޔާސީ ކޮމިޝަނެއް އުފައްދާފައެވެ. އެކޮމިޝަނަށް ގާނޫނުން ބޮޑެތި ބާރުތަކެއް ވެސް މިހާރު ވަނީ ދީފައެވެ.