ސ. ގަމުގައި ހިންގާ އޭޝިއަން އެކަޑަމީ އޮފް އެރޮނޮޓިކްސް ފްލައިން ސްކޫލްގެ ބޯޓެއް ޝަންގްރިއްލާ ކައިރީ ކަނޑަށް ވެއްޓިއްޖެއެވެ.
"އައްޑޫލައިވް" އަށް މައުލޫމާތު ލިބިފައިވާ ގޮތުގައި ބޯޓު ވެއްޓުނު އިރު ބޯޓު ދުއްވަންއިނީ މަރަދޫއަށް ނިސްބަތްވާ އަންހެން ކުއްޖަކާއި އިންޑިއާގެ އިންސްޓްރަކްޓަރެކެވެ. މަރަދޫއަށް ނިސްބަތްވާ އަންހެން ކުއްޖާއަކީ ޕައިލެޓު ކޯސް ހަދަމުން އަންނަ ދަރިވަރަކެވެ.
މަންޒަރު ދުށް ޝަންގްރިއްލާގެ މުވައްޒަފަކު ބުނީ ބޯޓު ވެއްޓުނީ އެ ރިސޯޓުގެ ވޯޓާ ސްޕޯޓްސް އާއި ދިމާލު ބޭރަށް ކަމަށެވެ. މިހާދިސާ ހިނގި ވަގުތު ޝަންގްރިއްލާ ރިސޯޓުގެ ޑައިވިން ދޯނި ބޯޓު ވެއްޓުނު ސަރަހައްދާއި ކައިރީގައި އޮތެވެ. އަދި ބޯޓުން ދަތުރުކުރި ދެމީހުން ނަގާފައިވަނީ ޝަންގްރިއްލާގެ ޑައިވިން ދޯނިންނެވެ. މިހާދިސާގައި ބޯޓުން ދަތުރު ދެމީހުންނަށް އެއްވެސް އަނިޔާއެއް ލިބިފައި ނުވެއެވެ.
މި ހާދިސާގައި ވެއްޓުނު ބޯޓުވަނީ ވަގުތުން އަޑިއަށް ގޮސްފައެވެ.
ފުލުހުން ބުނީ އައްޑޫ ފްލައިން ސްކޫލްގެ ބޯޓެއް ވެއްޓިގެން އުޅޭ ކަމުގެ މައުލޫމާތު ލިބިފައިވާ ކަމަށާއި އެކަން ބަލަމުން އަންނަ ކަމަށެވެ.