އައްޑޫ ސިޓީގެ ގުޅިފައިވާ ފަސް ރަށުގެ ތެރެއިން ފޭދޫ، މަރަދޫ ފޭދޫ، މަރަދޫ އަދި ހިތަދޫގެ ބައެއް ސަރަހައްދުތަކުން ކުއްލި ގޮތަކަށް ކަރަންޓު ކެނޑިއްޖެއެވެ.
މިސަރަހައްދަށް މޫސުން ގޯސްވެ ވަރަށް ބޮޑަށް ވިއްސާރަ ވެފައިވާއިރު ކަރަންޓު ކެނޑިފައިވަނީ މިރޭ ދަންވަރު 2:20 އެހާކަށްހާއިރެވެ. އެގޮތުން ފުރަތަމަ ކަރަންޓު ގޮސްފައިވަނީ ފޭދޫ އިން ކަމަށް މައުލޫމާތު ލިބިފައިވާއިރު އެއާއެކު މަރަދޫ ފޭދުއާއި މަރަދޫ އަދި ހިތަދޫގެ ދެކުނު ސަރަހައްދު ވަނީ ކަރަންޓު ކެނޑި ކަނު އަނދިރީގެ ހާލަތަކަށް ގޮސްފައެވެ.
މީގެ އިތުރުން ގަން އިންޓަނޭޝަނަލް އެއާޕޯޓަށް ޖައްސަން އޮތް ޝެޑިއުލް ފްލައިޓެއް ވަނީ މޫސުން ގޯސްވުމުގެ ސަބަބުން ރަންވޭއަށް ނުޖެއްސި އެތައް އިރެއް މަތީގައި ހޭދަކުރުމަށް ފަހު އެހެން އެއާޕޯޓަކަށް ޖެއްސުމަށް މިސްރާބު ޖަހާފައެވެ. ޚަބަރު ލިބޭ ގޮތުގައި މިބޯޓު މިހާރު މިސްރާބު ޖަހާފައިވަނީ އެނބުރި ވެލާނާ އިންޓަނެޝަނަލް އެއާޕޯޓަށް ޖެއްސުމަށެވެ.
އިންޑިޔާ އިން ވަނީ ރާއްޖޭގައި އުފެދިފައިވާ ވިލާގަނޑެއް ތޫފާނަކަށް ބަދަލުވެދާނެ ކަމުގެ އިންޒާރު އިއްޔެގެ ވަގުތެއްގައި ދީފައެވެ. މޫސުމާ ބެހޭ އިދާރާއިން ވަނީ ލާމާއި އައްޑުއާ ދެމެދުގެ އަތޮޅުތަކަށް މޫސުން ގޯސްވާނެ ކަމުގެ އިންޒާރާއެކު ޔެލޯ އެލާޓު އާންމުކޮށްފައެވެ.