މާ ގިނަ ބާރުތަކެއް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ހޯއްދަވަން މަސައްކަތް ކުރުމުން އެމަނިކުފާނުގެ ޕާލަމެންޓްރީ ގްރޫޕް ބައިބައިވެ އަތަށް ގޮވައިފި ކަމަށް ނޮޅިވަރަމް ދާއިރާގެ އަމިއްލަ މެމްބަރު މުހައްމަދު ނަޝީދު އަބްދުﷲ ވިދާޅުވެއްޖެއެވެ.
މެމްބަރު ނަޝީދުގެ ފާޑުވިދާޅުވުންތައް ރައީސް ނަޝީދަށް އަމާޒުކޮށްފައިވަނީ މިއަދު ކުރެއްވި ޓުވީޓަކުންނެވެ. ޓުވީޓުގައި އޭނާ ވިދާޅުވީ، "އަންނިގެ މުށުތެރެއަށް ބާރުތައް ލާން ވެގެން ހަދަން އުޅުނު ސުޕަރ ކޮމިޓީ ކަންތަކުގައި އެމްޑީޕީގެ ޕާލިމެންޓްރީ ގްރޫޕް ދެބައިވެ، ރައީސް ނަޝީދު އަތަށް ގޮވައިފި،" މިހެންނެވެ.
Anni ge mushuthere ah baaru thah laan vegen hadhan ulhunu super committee kan thakuga MDP PG dhebai ve @MohamedNasheed thah govaifi#Mikanvesminimeneee
— Mohamed Nasheed Abdulla (@MNA_MosTaaA) August 19, 2019
އެއީ ރޭ އެމްޑީޕީގެ ޕާލެމްންޓްރީ ގްރޫޕުގެ ބައްދަލުވުމަކަށް، ރައީސް ނަޝީދު ހުށައެޅުއްވި 'ސުޕަ ކޮމިޓީ' ޚިޔާލަށް ޕީޖީގެ ތެރޭގައި ފިނި ތަރުހީބެއް ލިބުމާ ގުޅިގެން ކުރެއްވި ޓުވީޓެކެވެ. އެމްޑީޕީގެ ޕީޖީއިން ވަނީ ރައީސް ނަޝީދުގެ މި ހުށައެޅުމަށް ތާއީދެއް ނެތް ކަމަށް ނިންމާފައެވެ.
ފަންސާހަށް ވުރެ ގިނަ މެމްބަރުން ބައިވެރިވި ޖަލްސާގައި ބިލަށް ރުހުން ނުދޭން އަޣުލަބިއްޔަތުން ވަނީ ފާސްކޮށްފައެވެ. މި ކޮމިޓީއަކީ ސަރުކާރުން ފޮނުވާ މެމްބަރުންނާއި މިނިވަން މުއައްސަސާތަކުގެ މެމްބަރުން އިޚުތިޔާރު ކުރުމާއި ފަނޑިޔާރުން އައްޔަންކޮށް ވަކިކުރުމުގެ ބާރު މުޅިން ލިބިދޭ ކޮމިޓީއެކެވެ.