މާލޭގައި ދިރިއުޅޭ އައްޑޫ ރައްޔިތުންނާއި އައްޑޫ ސިޓީ ކައުންސިލުން ބައްދަލު ކުރަން ނިންމައިފިއެވެ.
އައްޑޫ ކައުންސިލުން މިއަދު ނެރުނު އިއްލާނެއްގައި ބުނެފައިވަނީ މާލޭގައި ދިރިއުޅޭ އައްޑޫ ރައްޔިތުންނާއި ބައްދަލު ކުރުން މިމަހުގެ 24 ވަނަ ދުވަހުގެ ރޭ ދަރުބާރުގޭގައި އޮންނާނެކަމަށެވެ. ގަޑިއަކީ ރޭގަޑު 8:30 އެވެ.
މި ބައްދަލުވުމަށް މާލޭގައި ދިރިއުޅޭ އައްޑޫގެ ވީހާވެސް ގިނަ ބަޔަކު ހާޒިރުވުމަށް އައްޑޫ ސިޓީ ކައުންސިލުން އެދެއެވެ.
އައްޑޫ ކައުންސިލްގައި ހިމެނިވަޑައިގަންނަވާ ކައުންސިލަރުން މިހާރު ތިއްބެވީ މިއަދު މާލޭގައި ކުރިއަށްދާ އެމްޑީޕީ ކައުންސިލަރުންގެ ކޮންފަރެންސްގައި ބައިވެރިވުމަށް މާލެ ވަޑައިގެންފައެވެ.
އައްޑޫ ސިޓީ ކައުންސިލުގެ 7 މެމްބަރުންނަކީ އެމްޑީޕީއަށް ނިސްބަތްވާ މެމްބަރުންނެވެ. މޭޔަރ ސޯބެ ގެންދަވަނީ ކައުންސިލުންގެ ތިންވަނަ ދައުރު ފުރިހަމަ ކުރައްވަމުންނެވެ.
އައްޑޫ ކައުންސިލުން މިދިޔަ ޖުލައި މަހު ވަނީ އައްޑޫގެ ރައްޔިތުންނާއި ބައްދަލުކޮށްފައެވެ.