އަދާލަތު ޕާޓީގެ އެއް ފައުންޑަ މެމްބަރު އަދި ކުރީގެ އިސްލާމިކް މިނިސްޓަރު ޑރ. އަބްދުލް މަޖީދު އަބްދުލް ބާރީ އެ ޕާޓީން ވަކިވެވަޑައިގެންފި އެވެ.
އެމްޑީޕީގެ ރިޔާސީ ކެންޑިޑޭޓް މުހައްމަދު ނަޝީދުގެ ރަނިންމޭޓަަށް ވެވަޑައިގަންނަވާނެ ކަމުގެ އަޑުތަކެއް ވެސް ފެތުރިފައިވާ އަދާލަތު ޕާޓީގެ އިލްމުވެރިންގެ މަޖިލީހުގެ ރައީސްކަން ވެސް ކުރިން ކުރެއްވި ޑރ. ބާރީ އެ ޕާޓީން ވަކިވެވަޑައިގެންނެވި އިރު އޭނާ އަދާލަތުގެ ހަރަކާތްތަކުގައި ދުރުގައި ހުންނަވާތާ ގިނަ ދުވަސްތަކެއް ވެއްޖެ އެވެ.
ގައުމީ ޔުނިވަސިޓީގެ ފެކަލްޓީ އޮފް ޝަރީއާ އެންޑް ލޯ ގެ ސީނިއާ ލެކްޗަރާއެއްގެ ގޮތުގައި މިހާރު މަސައްކަތް ކުރައްވާ ސ. ހުޅުދު އަށް ނިސްބަތްވާ ޑރ. ބާރީ ވިދާޅުވީ މިދުވަސްކޮޅު ބޮޑަށް އުޅުއްވަނީ ޔުނިވަސިޓީގެ މަސައްކަތްތަކުގައި ކަމަށެވެ. އަދި ސިޔާސީ ކަންކަމާ ނުވިސްނަވާ ކަމަށް ވިދާޅުވި އެވެ.
ޑރ. ބާރީ ވަނީ މި މިހުގެ 14 ވަނަ ދުވަހުގެ ރޭ ޝެއިހް ހުސައިން ރަޝީދު ތަރުޖަމާ ކުރެެއްވި ދިނީ ފޮތެއް، ނަޝީދު ވެސް ބައިވެރިވެ ވަޑައިގެނެންވި ހަފުލާއެއްގައި ނެރެދެއްވާފަ އެވެ.