ކަޝްމީރުގެ މައްސަލާގައި އިންޑިއާ އާއި ޕާކިސްތާނާއި ދެމެދު އުފެދިފައިވާ ނުތަނަވަސްކަމުގެ މައުލޫމާތު ޕާކިސްތާނުން ދިވެހި ރާއްޖެ އާއި ހިއްސާކޮށްފިއެވެ.
ޕާކިސްތާނުގެ ފަރާތުން މި މައުލޫމާތު ރާއްޖެ އާއި ހިއްސާކޮށްފައިވަނީ ރާއްޖޭގެ ޚާރިޖީ ވަޒީރު އަބްދުﷲ ޝާހިދަށް ފޯނުން ގުޅުއްވައި މައުލޫމާތު ދެއްވަމުންނެވެ.
ޕާކިސްތާނުގެ ޚާރިޖީ ވަޒީރު މަޚްދޫމް ޝާހް މަޙްމޫދު ޤުރޭޝީ އަބްދުﷲ ޝާހިދަށް ފޯނުން ގުޅުއްވައި ވަނީ ޖައްމު އެންޑް ކަޝްމީރުގެ މައްސަލައިގެ އެންމެ ފަހުގެ މައުލޫމާތާއި، އިންޑިއާއިން އެޤައުމުގެ ޤާނޫނު އަސާސީގެ 370ވަނަ މާއްދާ އުވާލުމާއި މެދު ޕާކިސްތާނުން ދެކޭ ގޮތުގެ މައުލޫމާތު މިނިސްޓަރ ޝާހިދަށް އަރުވާފައެވެ.
މިނިސްޓަރ ޝާހިދުގެ ވާހަކަފުޅުގައި އެމަނިކުފާނަށް ފޯނުން ގުޅުއްވިކަމަށްޓަކައި މިނިސްޓަރ ޤުރޭޝީއަށް ޝުކުރު ދެންނެވިއެވެ. އަދި ޕާކިސްތާނާއި އިންޑިއާއަކީ ދިވެހިރާއްޖެއާއި ވަރަށް ރަޙުމަތްތެރި ދެ ޤައުމުކަމަށާއި، އެ ދެ ޤައުމުގެ މެދުގައި އުފެދިފައިވާ ޚިޔާލު ތަފާތުވުންތައް ސުލްހަވެރިކަމާއި އެކު ހައްލުކުރުން މުހިއްމުކަމަށް މިނިސްޓަރ ޝާހިދު ފާހަގަކުރެއްވިއެވެ.
އަދި އިންޑިއާގެ ޤާނޫނު އަސާސީގެ 370 ވަނަ މާއްދާ އުވާލުމަކީ އިންޑިއާގެ ދާޚިލީކަމެއްކަމަށް ދިވެހިރާއްޖެއިން ދެކޭކަމަށްވެސް މިނިސްޓަރ ޝާހިދު ވިދާޅުވިއެވެ.
މިނިސްޓަރ ޝާހިދުގެ ވާހަކަފުޅުގައި ދިވެހިރާއްޖެއިން އަބަދުވެސް ޕާކިސްތާނުގެ ގާތް ރަހުމަތްތެރިއެއްގެ ގޮތުގައި އޮންނާނެކަމުގެ ޔަޤީންކަން އެޤައުމުގެ ޚާރިޖީ ވަޒީރަށް އެރުވިއެވެ. އަދި ދެޤައުމު ގުޅުން ކުރިއަށް އޮތްތަނުގައިވެސް ބަދަހިކަންމަތީ އޮންނާނެކަމަށް އުއްމީދުކުރައްވާކަމަށް ވިދާޅުވިއެވެ.
ޕާކިސްތާނުންވަނީ ކަޝްމީރުގެ މައްސަލަ ދުނިޔޭގެ ކޯޓަށް ހުށަހެޅުމަށްވެސް ނިންމާފައެވެ.