ދިވެހިންގެ ތެރޭގައި މިހާރަކަށް އައިސް ކާބަފައިން ކޮށްފައިވާ ނަމޫނާ މަސައްކަތްތައް މަޑުމަޑުން ފަނޑުވެގެން ދާން ފަށައިފި އެވެ. ކާބަފައިން ކޮށްފައިވާ ބުރަ މަސައްކަތްތައް މިހާރު އެއްވެސް ގޮތަކަށް ނުފެނެއޭ ބުނުމަކުން ދޮގަކަށް ނުވާނެ އެވެ.
ދިވެހިންގެ އާދަކާދައިގެ ނަމޫނާއަކީ އެ ނަމޫނާއަކަށް އަބަދުވެސް އަޅުގަނޑުމެން ފަހުރުވެރިވާ ނަމޫނާތަކެކެވެ. އެގޮތުން ކޮންމެ އަހަރެއްގެ ރަމަޟާން މަސް އަޅުގަނޑުމެންނާ ކުރިމަތިލަމުންދާ އިރު މިފަދަ އެތައް ކަމެއް ހިތުގައި އާލާވަމުން ދެ އެވެ.
ރަމަޟާން މަސް ފެށުމުގެ އެތައް ދުވަހެއް ކުރިން އޭރު އެ މަހަށް ތައްޔާރުވާން ގިނަ ބަޔަކު ފަށަ އެވެ.
ހާއްސަ ގޮތެއްގައި ކެއުން ބުއިމަށް ބޭނުންވާ ތަކެތި ތައްޔާރު ކުރުމުގަ އެވެ. އެގޮތުން ބަލާ އިރު ހަވާދަކީ މިއަދާ ހަމައަށް ވެސް ހުރިހާ ގެއަކުން ވެސް ރޯދަ އަށް ގެއަށް ހޯދާނެ އެއްޗެކެވެ. އެގޮތުން ހަވާދު ހަނާ ކުރުމަށް ބޭނުންވާ ކާށި އެއްކޮށް، ހިކި މިރުހާއި ދިރި، ކޮތަންބިރި، ކާފޫރުތޮޅި، ފޮނިތޮށި، ކަރަންފޫ ފަދަ ބާވަތްތައް ގަނެ، އަވީލައި ހަވާދު ކުރަން ތާވަލް ކުރާ ދުވަހަކަށް ލިސްޓްގައި ހިމެނޭ ހުރިހާ އެއްޗެއް އެއްތަން ކުރާނެ އެވެ.
ނަމަވެސް ފާހަގަކޮށްލެވޭ އެއްކަމަކީ ރޯދަ މަހު ގިނަ ބަޔަކަށް ކަމުދަނީ "ދިވެހިން އުފައްދާ" ދިވެހި ހަވާދެވެ. ހަފްތާއެއް ނުވަތަ ދެ ހަފްތާއެއް ކުރިން އޭރު ދިވެހި ހަވާދު ތައްޔާރު ކުރަނީ އަވައްޓެރިންނާއި އެކުވެ، އެންމެ އެއް ތަނަކަށް ޖަމާވެގެންނެވެ. މިކަމަށް އަޅުގަނޑުމެން ބަލާލާ އިރު މިކަމަކީ ވަރަށް ފޯރި އާއި ޖޯޝާ އެކު ކުރާ ކަމެކެވެ. މިކަމުގައި އަންހެންވެެރިން ހާއްސަ އެެކުވެރިކަމަކާއި ބަދަހިކަމެއް ދައްކަ އެވެ. މިއީ ކުރިން އައްޑޫން ފެންނަމުން ދިޔަ ވަރަށް ހާއްސަ މަސައްކަތެކެވެ.
ކޮންމެ ގެއަކުން ވެސް ކޮންމެ ވެސް އެއް ބާވަތެއް ހޯދައި، އެފަހަރަކު ހަވާދު ހަދަން ދާންޖެހޭ ގެއަކަށް ދާނެ އެވެ. ފަތިހު ފަތިސް ނަމާދުކޮށްގެން މަސައްކަތް ކުރިޔަށް ދަނީ ނުލާހިކު އެކުވެރި މާހައުލެއްގަ އެވެ. މިކަމަކީ ހަމައެކަނި އަންހެނުން ކުރާ ކަމެއް ވެސް ނޫނެވެ.
އެ މީހުންނާ އެއްކޮށް ފިރިހެނުން މިކަމުގައި ބައިވެރިވެ އެހީތެރިކަން ފޯރުކޮށް ދެމުން ދެ އެވެ. އެގޮތުން ހަވާދުގެ މައިގަނޑު ކަމަށްވާ ހުނި ގޭނުމަށް ބޭނުން ކުރާ ކާށި ހޯދުމުގައި ފިރިހެނުންގެ ދައުރު ބޮޑެވެ. އެތަން މިތަނުން ކާށި ހޮވައިގެން ފިރިން ގެނެސް ދޭނެ އެވެ.
ހަވާދު ހަނާ ކުރުމުގެ މަސައްކަތަކީ ގުރޫޕްތަކަށް ބަހައިލައިގެން ކުރިޔަށް ދާއިރު ނުވަގަޑި ސައިގެ އިތުރުން މެންދުރުގެ ކެއުން ތައްޔާރު ކުރަން ވަކީ ޓީމެއް އޮންނާނެ އެވެ. އެ މީހުންގެ މަސައްކަތްކަތަކީ ކެއުމުގެ ކަންތައްތައް ހަމަޖެއްސުމެވެ. އަނެއް ބަޔަކު ދަރު ހޯދާނީ އެވެ. ހަމަ އެގޮތަށް "ހަވާދު ހަނާ" ކުރަން ވެސް ވަކި ޓީމެއް އޮންނާނީ ކަނޑައަޅާފަ އެވެ.
ހަވާދު ހަނާ ކުރުމަށް ފަހު ދެން އޮންނާނީ ހަވާދުގަނޑުން ތެޔޮ އެރުވުމެވެ. އެކަން ކުރާނީ ވަނަށް އަޅައި ހަވާދު ތަަޅައިގެންނެވެ. މިއީ ހަމަ ބަހާލައިގެން އެކުވެރިކަމާ އެކު ކުރާ މަަސައްކަތެކެވެ. ހަވާދުން ތެޔޮ އެރުވުމަށް ފަހު ދަޅު ދަޅަށް ހަވާދު ރައްކާ ކުރާނެ އެވެ. އެ ބޭނުން ކުރަން ފަށާނީ ރޯދަ މަހު އެވެ.
އެގޮތުން ހަވާދު ފުނޑައިގެން ކައްކާ ތަފާތު ރިހަތަކަކީ ރޯދަ މަހުގެ އެންމެ ހާއްސަ އެއް ބާވަތްކަމުގައި އޮންނަނީވެފަ އެވެ. އެއީ ރޯދަ މަހުގެ ރަހަ އެވެ. ދިވެހި ރަހަ އެވެ. އައްޑޫ ހަވާދުގެ މީރު ރަހަ އެވެ.
ހަވާދުގެ މަސައްކަތް އެއްކޮށް ނިމޭ އިރު އެއްވެސް ބަޔަކަށް އެކަމަކީ އެހާ ފަސޭހައިން ނިންމާލެވުނު ކަމަކަށް ވެސް ހިތަކަށް ނާރަ އެވެ. އެއީ ސަބަބެއް ވެސް ނެތިއެއް ނޫނެވެ.
ގިނަ ބަޔަކު މަޖާކޮށް އެއްވެސް މީހަކަށް އެކަނި ކަމެއް ހަވާލު ނުކޮށް ޓީމެއް ގޮތަށް މަސައްކަތް ކުރުމުންވާނެ ގޮތެވެ. ނަމޫނާތައް އަންނަން އޮތް ޖީލަށް އެމީހުން ވަނީ ދައްކާފަ އެވެ.
މީގައި އެންމެ ބޮޑަށް ފާހަގަ ކުރެވުނު ކަމަކީ އޭރު "ހަވާދު ހަނާ ކުރަނީ" ވިޔަފާރިއަކަށް ނޫނެވެ. ހަމައެކަނި ރޯދަ މަހުގައި ބޭނުން ކުރުމަށާއި ރަށުން ބޭރުގައި ތިބި އާއިލާ މީހުންނަށް ހަދީޔާއެއް ދިނުމުގެ ގޮތުންނެވެ. ނަމަވެސް މިހާރު "ހަވާދު ހަނާ" ކުރަނީ ވިޔަފާރީގެ ބޭނުމުގައި ކަމަށް ގަބޫލް ކުރެވެ އެވެ.
އަދި ރޯދަ އާ ދިމާކޮށް ގޭގައި ހަވާދު ހަނާ ކުރުމުގެ މަސައްކަތް މިހާރު ނެތޭ ބުނާ ވަރަށް އެކަން އޮނބިއްޖެ އެވެ. ފަހަރުގައި އެއީ ދިރިއުޅުމަށް އައި ޒަމާނީ ބަދަލުތަކާ އެކު ދިމާވި ކަމެއް ކަމަށް ބެލެވެ އެވެ. ގިނަ ބަަޔަކު މިހާރު ހަވާދު ބޭނުން ކުރަނީ ވެސް ގަނެގެންނެވެ.