ލާމަރުކަޒީ ގާނޫނެއް އޮވެމެ، ކައުންސިލްތަކަށް ބާރުދޭން ގާނޫނު އަސާސީގައި ލިޔެފައި އޮތަސް މިއަދު ކުރިމަތިލާ ހަގީގަތަކީ ކައުންސިލްތަކަށް އެއްވެސް ބާރެއް ނެތް ކަން ކަމަށް އައްޑޫ ސިޓީގެ މޭޔަރ އަބްދުﷲ ސޯދިގް ވިދާޅުވެއްޖެއެވެ.
ޓްރާންސްޕޭރެންސީ މޯލްޑިވްސްއިން ދެކުނުގެ ކައުންސިލްތަކަށް އަމާޒުކޮށްގެން ބާއްވާ ލޯކަލް ގަވަމެންޓް ކޮންފަރެންސް މިއަދު ހެނދުނު އީކުއޭޓާ ވިލެޖުގައި ފަށާފައިވާއިރު މިކޮންފަރެންސްގައި ބައިވެރިވެވަޑައިގެން މޭޔަރ ދެއްކެވި ވާހަކަފުޅުގައި ވިދާޅުވީ މާލީ ބާރުވެރިކަން ނެތި ކައުންސިލްތަކަށް، ރައްޔިތުންނަށް ބޭނުންވާ ކަންކަން ކުރުމަށް ވަރަށް ދަތި ކަމަށެވެ.
އައްޑޫ ސިޓީގައި ގަހެއް އިންދަން ބޭނުންވުމުން ފުރަތަމަ މައި ސަރުކާރުގެ ހުއްދައެއް ހޯދަން ޖެހުމަކީ އެއީ ކައުންސިލްތައް ބާރުވެރިކުރުން ނޫން ކަމަށާއި ނަމަވެސް އެއީ މިއަދުގެ ހަގީގަތް ކަމަށް ސޯބެ ވިދާޅުވެފައިވެއެވެ. އައްޑޫގެ ރައްޔިތަކު ދަނޑުގައި މިރުސް ގަހެއް އިންދާ ވިއްކަން މަސައްކަތް ކުރާ ހިސާބުން އެ ދަނޑަށް ދީފައިވާ ކަރަންޓުގެ އަގު ބޮޑުވުމުން ކައުންސިލަށް ގުޅާ ޝަކުވާ ކުރަމުން އަންނަ ކަމަށާއި ނަމަވެސް އެއަށް ދޭނެ ޖަވާބެއް ކައުންސިލަރުންގެ ނެތް ކަމަށް ސޯބެ ވިދާޅުވިއެވެ.
ރައްޔިތުން ހޮޅު އަށީގައި ހަޓެއް ޖެހުމުން ފަހު ދުވަހު ފުލުހުން ގޮސް އެ ހަޓު ނަގަން އެންގުމުން ކައުންސިލަށް ގުޅުމުން އެއަށް ވެސް ދޭނެ ޖަވާބެއް ނެތް ކަމަށާއި، މިއީ ލާމަރުކަޒީ ނިޒާމެއް އޮންނަން ޖެހޭ ހަމައެއް ނޫން ކަމަށް ވިދާޅުވެ ކަންބޮޑުވުން ފާޅު ކުރެއްވިއެވެ.
މާލީ ބާރުވެރިކަމެއް ކައުންސިލްތަކުގައި ނެތް ކަމަށާއި، ކައުންސިލްތަކުން މަސައްކަތެއް ކުރަން ބޭނުންވެއްޖެނަމަ ފިނޭންސް މިނިސްޓްރީގައި ހުއްދައަށް އެދި ހުއްދަ ލިބުމުން ނޫނީ އެކަން ނުކުރެވޭ ކަމަށް ވިދާޅުވެ ސޯބެ ވަނީ މިއަދުގެ ލާމަރުކަޒީ ނިޒާމުގައި ހުރި މައްސަލަތައް ޚުލާސާ ކުރައްވާފައެވެ.
ރޭ މާލޭގައި ބޭއްވި ބައްދަލުވުމުގައި ރައްޔިތުންގެ ނުރުހުން އަމާޒުވީ ހަމައެކަނި ކައުންސިލަށް ނޫން ކަމަށާއި އެ ނުރުހުމަކީ މުޅި ދައުލަތަށް، ރައްޔިތުންގެ މަޖިލީހަށް އަމާޒުވި ނުރުހުން ކަމަށާއި އެކަން ހައްލުކުރެވެން ޖެހޭ ކަމަށް އެމަނިކުފާނު ވިދާޅުވިއެވެ.
މިއަދު ފެށޭ ކޮންފަރެންސް ނިމިގެން އަންނައިރު ކުރެވޭ އުއްމީދަކީ ޓްރާންސްޕޭރެންސީ މޯލްޑިވްސް އިން މިއަދުގެ ލާމަރުކަޒީ ގާނޫނު އިތުރަށް ހަރުދަނާ ކުރުމަށް ފިޔަވަޅުތަކެއް އަޅައި ބިލެއް ތައްޔާރު ކޮށް ހުށައެޅުން ކަމަށް މޭޔަރ ވިދާޅުވިއެވެ.